EDITORYAL - Pagkaanugon

Pagkaanugon na man sa kinabuhi ning mga kabataan nga magkutlo sa ilang kinabuhi gumikan lamang sa kakulang nila og salabotan sa reyalidad sa kinabuhi.

Sa Daanbantayan, duha ka 15-anyos nga manag-agaw nga taas pa kaayo unta og kaugmaon nga maabot, ang naghikog gumikan sa kahiubos kay wa sila hatagi og clearance sa ilang maestra nga mao karoy gibasol sa nahitabo sa duha.

Posibleng tinuod apan posible usab nga dili tinuod ang maong pasangil, apan di ikalimod nga dunay duha ka kinabuhing nausik tungod lamang sa kakulang sa pagsabot sa dagan sa kinabuhi.

Makaalarma ang maong hitabo tungod kay bata pa kaayo sila aron makahunahuna og ingon niini ka grabeng desisyon. Unsa man diay klase nga leksyon ang nakat-onan sa kabataan karon?

Tungod ba kaha kini sa ka-moderno sa panahon?  Pressure ba kaha gikan sa mga higala, mao nga wala na mahibawo sa papel diha sa pamilya ang kabataan? 

Ang bag-ong pagtratar sa kabataan karon layo na kaayo itandi sa kinaraan ug gani daghan nang higayon nga magkabangga g’yud ang kinaraan sa bag-ong pamaagi karon.

Ang pagdala sa ‘pressure’ sa kinabuhi anha makat-onan sa values education subject sa mga tunghaan,  apan sa pagkatinuod, mura na man kini og pakapin lang nga subject.

Wa kaayo hatagi og gibug-aton dili lang sa mga maestra kondili hasta sa mga estudyante.

Angay nga hinuktokan sa Department of Education kini nga hitabo ug kinahanglang ilang dawaton nga duna g’yuy mga sitwasyon nga susama niini nga kinahanglan nilang solusyonan kay sila kanunay ang basulon isip mga magtutudlo.