Ayaw ninyo pasagdahi

Nagsige lang og pasalig ang kadagkoan sa City Traffic Operations Management (CITOM) nga pangdakpon nila ang mga drayber sa mga sakyanan nga anha sagad i-parking daplin sa dalan D. Jakosalem.

Puwede ra man tingali nga mo-parking ang sakyanan sa hamubo nga higayon apan dili anha sa wala nga bahin sa karsada. “One Way” ang dalan D. Jakosalem gikan sa dalan Colon hangtud na sa eskena Ramos.

Apan daghan kaayo nga mga sakyanan nga anaa mag-parking sa “left side” sa karsada. Panahon sa hapon adunay mga sakyanan nga mag-parking atubangan sa usa ka Billiard Hall dapit sa dalan España.

Dayon sa left side gihapon diha sa unahan nga bahin sa eskena Bonifacio. Dunay tulo ka sakyanan nga sagad mag-parking sa tungasan nga bahin gikan sa eskena Imus paingon sa Ramos.

Unya, sagad mga taxi anha mo-parking atubangan sa usa ka karenderiya unahan og gamay sa eskena R. R. Landon tunga-tunga nga bahin sa dalan Ramos.

Siyaro og wala makabantay niini ang mga traffic enforcers? Dili ko motuo nga wala sila makabantay kay dili man sila mga buta. Usahay makapangutana ko sa akong kaugalingon kun nasayod ba kaha kini’ng mao nga mga enforcers sa balaud sa trapiko.

Kun tarong ka nga motorista dili g’yud unta ka mo-parking sa wala itugot nga dapit. Kay miabuso man ang mao nga mga tag-iya og sakyanan, higayon na sa mga traffic enforcers ang pagdisiplina kanila.

Tudloi sila og leksyon, o kaha kamo nga mga opisyal sa CITOM maoy motudlo og leksyon sa inyong mga traffic enforcers nga susama ra og mga “pahoy” sa humayan.

Mas maayo pa lagi ang mga pahoy kon tawo-tawo sa humayan kay mahadlok pa ang mga langgam, apan ang mga CITOM wala g’yud respitohe sa mga drayber kay motutok ra man sa mga kalapasan.

* * *

Gipangutana g’yud nako si LTO-7 Regional Director Arnel Tancinco kun unsay ilang himuon aron epektibo nila nga mapatuman ang Republic Act 10586, ang balaud nga mosilot sa mga mag-drive nga hubog.

Nasabtan nako nga wala g’yud sila’y operation nga ipahigayon aron lang manakop og mga drayber nga nakainom. Gani, kun adunay “initial violation” ug nagtuo sila nga nakainom ang drayber, mohimo pa sila og mga pagsuway aron sukdon kun dili ba sila hubog.

Kini base sa ilang tinan-awan, kun makalakaw ba sila nga tul-id labing menus siyam ka lakang, makabarug nga usa lang ka tiil. Kun dili sila makahimo niini, anha pa nga gamitan sila og breath analyzer.

Dagko kaayo ang silot sa mga mapositibo.