Unsa nga klaseng lider

Anhi nato makomparar sa mga nahitabo karon sa Makati City unsa nga klaseng pagka-opisyal sa atong gobiyerno silang Bise Presidente Jejomar Binay ug DILG Secretary Mar Roxas ug unsa sila nga klaseng lider simbako og mapili sa 2016 presidential election.

Nagsugod ang drama sa Makati sa dihang nanggawas ang mga akusasyon sa korupsiyon sa pamilyang Binay.

Kay kun dili pa bise presidente, maapil gyud unta ang amahan nga Binay sa kasong gisang-at sa Ombudsman tungod sa giingong overpricing sa Makati parking building. Ug ning bag-o lang, ang Ombudsman misuspenso kang Mayor Junjun Binay tungod ning kasoha.

Nagmagahi sa pagtuman sa suspension order ang pamilyang Binay, lakip na ang bise presidente. Gidala hinuon ni Bise Presidente Binay ang iyang team sa United Nationalist Alliance didto sa Makati City Hall aron gamiton nga tigpamaba sa krisis nga giatubang sa ilang pamilya.

Sa laing bahin, ang Department of Interior and Local Government nga gipanguluhan ni Sec. Roxas walay nahimo gawas sa pagpatuman sa suspension order. Bisan dili pa si Roxas ang kalihim sa DILG, dili mausab ang balaod nga ang DILG gyud ang mopatuman sa suspension order batok sa mga mayor ug ubang opisyal sa mga lokal nga kagamhanan.  Kay ang DILG man ang gisangonan sa pagsuperbisar sa mga opisyal sa lokal nga kagamhanan ubos sa Local Government Code of 1992.

Kun tuhoan ang pamilyang Binay sa ilang reklamo nganong gitayming ang pagsuspenso nga hapit na ang 2016 nga eleksiyon, wala na lay mahitabong pagsuspenso sa mga malapason nga opisyal sa gobiyerno. Apan sa balaod, wala idili ang pagsuspenso bisan hapit na ang eleksiyon. Ang reklamo sa mga Binay gituyo lang gyud aron gub-on ang imahe sa DILG nga gipanguluhan sa iyang kontra ug gipaabot nga ikasakbang sa 2016 presidential election – si Mar Roxas.

Nganong maghimo pa man gyud og eksena ang pamilyang Binay nga sa sinugdanan wala man gyud sila moatubang sa mga pasangil nga gibato batok kanila? Makapila sila gipatawag sa Senado aron patubagon sa mga reklamong korupsiyon ug pagpakaadunahan ginamit ang salapi sa katawhan, wala man gyud sila moatubang.

Wala nila atubanga ang Senado, karon ilang gisupak ang mando sa Ombudsman pagsuspenso kang Junjun Binay.

Ang Court of Appeals nahimong “too late a hero” kay ulahing naabot ang temporary restraining order. Napapanumpa na ang bise mayor sa Makati.  Unsa pa man ang i-restrain sa korte kun na-serve na ang mando sa Ombudsman pagsuspenso kang Junjun Binay? Ulahi ra og usa ka tikang ang mga Binay.

Ning sitwasyona, unsa kaha nga klaseng “enforcer of the law” kun ma-presidente si Binay nga karon lang, dili man siya motuman sa balaod kay iyang anak ang naapeke?