Paugat ni Aquino
Uwahi na bang tanan aron moangkon si Presidente Noynoy Aquino og reponsibilidad ug mangayo og pasaylo sa iyang tampo sa pagka bulilyaso sa Oplan Exodus sa Mamasapano, Maguindanao? Dako ang tentasyon nga magpaugat siya ug igo na lang mopaundayon sa nasugdan nang pagtingob sa tanang tulisok ngadtong Direktor Getulio Napeñas, ang girelibohang hepe sa Special Action Force (SAF).
Ang kataas sa iyang garbo ug kagahi sa iyang ulo ug talagsaon nilang kasuod makapasayon sa pagpadayon pagpakahilom sa sayop niyang pagtugyan sa sekretong operasyon ngadto sa suspendidong hepe sa Philippine National Police (PNP) nga si Direktor Heneral Alan Purisima. Nahinayak na ba gyod siya pagluok sa kamatuoran?
* * *
Nilampos ang mga magtatambag ni Aquino pagkumbinser niya nga di makaayo sa pamunoan ang pag-angkon og responsibilidad sa trahedya nga nipatay sa 44 ka SAF commandos. Kini bisan klarong napakyas ang mga alyado ni kanhi presidente Gloria Arroyo ug ubang naligsan sa kampanya batok sa pangurakot sa mga maniobra pagpalagpot niya sa katungdanan.
Makapahingpit sa pagtak-om ni Aquino pag-angkon sa iyang sayop mao ang laing panghadlok sa iyang mga alyado ug mga kaatbang: Mahimong maputos siya og mga kasong kriminal kun mahukasan na sa iyang immunity sa pagkapupos sa iyang termino sa udtong tutok sa Hunyo 30 sa sunod tuig.
* * *
Ang kabalaka unsay dangatan niya human sa Malakanyang maoy usa sa nakapasuko pag-ayo ni Aquino sa pagbasura sa Korte Suprema sa pipila ka probisyon sa iyang Disbursement Acceleration Program (DAP). Nga nihudlat siya paglusad og people power batok sa mga mahistrado nga iyang gidudahan nga nagtinguha nga prisuhon gyod siya kun wa na sa gahom.
Wa makapuypoy sa kabalaka ni Aquino ang mga sungog sa mga turutot sa United Nationalist Alliance (UNA) nga pasakaan siya og mga kasong treason ug plunder tungod sa Mamasapano ug ubang mga pasangil sa eskandalo batok sa iyang pamunoan ug labing suod nga mga alyado. Mahimong guwardiyado na ang sunod niyang mga pamahayag aron pagpanalipod sa iyang kaugalingon sa umaabot nga mga kaso.
* * *
Apan di bakakon si Aquino. Di paugat ang sukaranan sa iyang pamunoan. Di pagtabon sa kamatuoran ang kinauyokan paghimo sa dakong sakripisyo pagtanyag sa iyang kaugalingon pagduma sa nasud human sa siyam ka tuig nga way kinutoban nga pagpahimus sa iyang gisundang pamunoan.
Maong masaligon ko nga sa kapulihay maminaw si Aquino sa iyang tanlag: Nga iyang ipatigbabaw ang mas dakong interes sa nasud ug sa katawhan kay sa personal nga kabulahanan sa iyang mga suod. Mas madugay mas maglisod si Aquino pagbakwi sa iyang pagpanghunaw sa Mamasapano. Apan di pa uwahing tanan. Kun nangita og timailhan nga makadasig niya pag-angkon og responsibilidad, ato siyang pahinumdoman nga gipasaylo na siyang daan sa katawhan.
- Latest
