EDITORYAL – Driver nga hubog

Sigurado nga makakita’g away ang mga sakop sa Land Transportation Office (LTO) kana kun tinud-on g’yud nila ang ilang gipasiatab nga hugtan na nila pagpatuman ang balaud batok sa mga tawo nga mag-drive nga nakainom og ilimnong makahubog.

Gipahibalo sa kadagkoan sa LTO nga gipadad-an na sila og mga Alcohol Breath Analyzer sa ilang central office aron gamiton pagsukod kun angay na ba nga dakpon ang drayber nga nagmaneho’g sakyanan nga nakainom.

Apan motuo kaha kita nga ang mga sakop sa LTO mo-duty sa lawom na nga gabii kay mao man kana ang oras nga ang mga gikan sa lainlain nga imnanan ug gikan nga mitambong og mga party nga ang nakainom nga drayber momaneho gihapon og sakyanan?

Dili kaha mahitabo ang pagpamusil kay daghan ra ba kaayo ang adunay armas ug kun makainom na mawad-an na sa tukma nga kabuot? May pang-alkontra na ba niini ang LTO.

Maayo ang tumong sa Republic Act 10586 kay gihimo ang balaud aron pag-discourage sa mga drayber nga dili gayud sila moinom og ilimnon nga makahubog kun mo-drive pa sila.

Dili imposible nga daghang motorista nga nagmaneho sa ilang sakyanan gikan sa inom nga inigkabuntag wala masayod kun ngano nga sila nakauli pa sa ilang tagsa-tagsa ka grahe.

Nagpasabot kini nga “danag” na lang ang pagmaneho nila sa sakyanan ug wala na masayod sa tukma nila nga gihimo. Kun ang mao nga mga tawo parahon sa mga mananakop unya duna sila’y armas, dili kaha sila diretso lang nga mamusil?

Apan mas nindot g’yud nga likayan na lang ang pag-inom og makahubog kun mo-drive pa.