Yuta nga Kabilin

CEBU, Philippines – Tuig 2004, nakig-estorya namo’ng mga tag-iya sa yuta  ang kanhi OIC sa Housing Urban Dev’t Office sa Mandaue City bahin sa proyekto sa siyudad nga gitawag nila og “socialized housing” para sa mga wala’y pinuy-anan.

Gihimo ang panagsabot uban sa pipila ka miyembro sa “Kalubihan Homeowner’s Assn.” ug napahimoan g’yud namo og “Deed of Conditional Sale” ni anhing Atty. Crisologo Monteclar kaniadtong Oktubre 25, 2004.

Wa na kami mahimo gawas sa pag-uyon nga ibaligya ang among yuta kay ang gobiyerno man ang nanginahanglan ug gawas pa daghan na kaayo’ng gitukod nga kabalayan sa among yuta nga wala kami kalibotan.

Amo man gud nga gipiyal sa among ig-agaw kini’ng yutaa kaniadto’ng tuig 1990, tungod sa among utang.

Ang problema kay wala namo damha nga madugay paghuman ang titulo, gani ang order sa korte para sa “survey authority” Abril 11, 2012 na man nahuman ug gihatagan mi og kopya sa broker, hasta sa kopya sa pag-survey niadto lang Mayo 15, 2013.

Magpanuko kami sa pagduol niini’ng mga tawo nga nagpuyo sa among yuta kun aduna kami panginahanglan kay dili man kamao motuman sa kasabotan diha sa paragraph 8 sa “Deed of Conditional Sale.”

Usa nako ka igsuon dugay-dugay g’yud nga nag-antos sa iyang sakit ug nangandoy nga makagamit sa grasya gikan niini’ng yutaa aron ikapatambal apan namatay na lang tawon wala makapahimulos.

Kaniadto’ng Sept. 2011, ako mismo ang nanghangyo og gamay lang nga kantidad para ipalit og tambal apan wa ko hatagi kay naniguro sa ilang kaugalingon gumikan kay wala pa mahuman ang titulo.

Tingali kun dili g’yud malutsan og titulo kini’ng yutaa angay na lang sila nga mamahawa o ba kaha magpaugat na lang kay ubos sa akong pangagpas ang usa ka yuta bisan deklarasyon lang ang papeles, magkinahanglan man gihapon og “Deed of Absolute Sale,” busa dili lang sila gihapon makalibre.

Paet baya kaayo kini sa among kabahin nga ang butang nga sinunod namo sa among inahan, wala na hinuon namo kapahimusli. Unta susihon kini sa namunoan sa Mandaue City, ilabi na sa opisina sa H.U.D.O. kay ila man kini’ng proyekto.