Sad-an g’yud sila

Mitingog na g’yud si DILG Secretary Mar Roxas ug miingon nga sila si kanhi PNP Chief Alan Purisima ug SAF commander Getulio Napeñas mao g’yud ang sad-an sa pagkamatay sa 44 ka SAF Commandos didto sa Maguindanao.

Ang akong argumento sa miagi nato’ng mga lindog susama gayud sa baruganan ni Roxas nga sila si Purisima ug Napeñas wala motuman sa kamandoan ni Presidente Aquino kanila.

Wala malilong nga si Presidente Aquino nakigtagbo ni Purisima ug Napeñas didto sa Malacañang ug gihisgotan nila ang pagahimoon nga operasyon pagdakop sa terorista nga si Marwan.

Human sa tigum, sila si Purisima ug Napeñas giingnan ni Presidente Aquino “Kayo na ang bahala pag-coordinate sa AFP.” Sa ato pa, gusto ni Presidente Aquino nga makaalayon ang militar sa mao nga operasyon.

Apan si Purisima nga nagtuo nga siya pa gihapon ang PNP chief bisan og gisuspenso na, mimando ni Napeñas nga dili lang usa pahibaw-on sila si DILG Secretary Roxas ug Acting PNP Chief Leonardo Espina.

Mao kana nga kun adunay manubag sa kamatayon sa SAF 44, sila mao si Purisima ug Napeñas. Ang sayop ni Presidente Aquino kay atol sa tigum, gipatawag g’yud unta niya si Espina.

Husto ang giingon ni Mar Roxas nga maayo’ng silotan sila si Purisima ug Napeñas. Apan unsa kaha’y silot nga ipahamtang kanila? Tingali, kaso nga administratiba kay polis man gihapon sila hangtud karon.

Kun may koordinasyon pa sa militar sa mao nga operation, dali ra unta kaayo ang pagpadala og helicopter nga makaabag sa mga SAF commandos ug dili sila mapatay sa mga MILF.