Aspalto na ‘sab sa karsada

May proyekto na usab ang Department of Public Works and Highways (DPWH) nga pag-aspalto sa kabahin sa Gorordo Avenue unahan sa Lahug Elementary School ug sa General Maxilom Avenue atubangan sa karaan nga Sacred Heart School for Boys.

Sa Gorordo Avenue, mao kini ang karsada nga kaniadto  nahibulong ko ngano’ng wala kini tiwasa pag-aspalto. Apan dili man g’yud guba, apan mas nindot ‘sab kun aspaltohon aron mapareho nga nindot ang kinatibuk-an nga karsada.

Mas nindot unta nga ang karsada nga kabahin sa Gorordo Avenue tungod sa eskena Sudlon paingon na ngadto sa JY Square, palapdan gayud unta ug did-an g’yud ang mga sakyanan nga anha mo-parking daplin sa karsada.

Kana nga bahin sa karsada maoy nakadugang sa kahuot sa mga sakyanan kay mga sakyanan anaa nagparking sa karsada nga gamay na kaayo. Kini unta maoy angay’ng tan-awon sa mga sakop sa CITOM Board kana kun nakakita sila sa mao nga dapit.

Sa General Maxilom Avenue, atubangan sa karaang Sacred Heart School for Boys, gamay ra nga bahin ang angay nga aspaltohon kay ang tungod nga bahin sa VECO stockyard ug menteryo sa Carreta nindot pa kaayo.

Kun apilon gani na nila og kaskas aron aspaltohon pag-usab makaingon na g’yud kita nga binuang na ang gihimo sa DPWH ug maisip na nga pag-usik-usik sa kuwarta aron lang makaangkon og komisyon ang mga opisyal.

Ang bati nga bahin sa karsada mao ang MJ Cuenco Avenue gikan sa eskena General Maxilom paingon sa Mabolo. Unya ang bahin sa Escario tungod g’yud sa Capitol Parish paingon na sa Gorordo Avenue. Kana maoy angay nga aspaltohon.

Awhagon nako ang kadagkoan sa CITOM nga kun aspaltohon na ang karsada ug resulta niini molapad na ang karsada, estriktoha ninyo ang pagdili sa pag-      parking nga himuon na lang grahean ang karsada.

Kini’ng CITOM usahay magpasiatab nga aduna na sila’y bag-ong towing truck apan wala g’yud makaguroy niana’ng mga sakyanan nga anha ra pabuntagi sa daplin sa karsada.

Pagkadaghan g’yud niini’ng mao nga mga sakyanan kun magkugi lang ang mga sakop sa CITOM towing team. Naay mga PUJ nga iya sa usa ka mayor sa lungsod, anha lang pabuntagi sa daplin sa V. Rama Avenue eskena P. del Rosario Extension.

Unya kanang panahon sa gabii, kanunay g’yud nga adunay mag-parking sa “left side” sa karsada nga kabahin sa D. Jakosalem Street gikan sa eskena P. del Rosario paingon na sa Ramos Street.

“Wrong parking” ang ilang gihimo ug angay na g’yud kini nga aksyonan apan walay gihimo ang CITOM.