Kinsa’y mobayad sa utang sa namatay?

Dear Atty. Divine,

Duna ko’y pangutana may labot sa utang sa akong inahan nga namatay na. Ang akong nanay nakautang og P82 mil ug ang iyang gihimo’ng collateral mao ang iyang yuta. Duna siya’y gipirmahan nga Real Estate Mortgage apan wala mapatik sa titulo ang maong mortgage. Niadto’ng miaging tuig, namatay si Nanay nga wala niya mabayri ang iyang utang. Karon nagplano unta ko nga ibaligya ang iyang kabilin nga yuta kay ako ra may iyang anak. Mahimo ba nako nga ibaligya ang yuta bisan kun naka mortgage kini? Unsa may mahitabo sa utang ni nanay nga patay na man siya? Makapaningil ba nako ang iyang giutangan? Unta imo ko’ng matubag sa akong mga pangutana. Daghang Salamat — Theo

Dear Theo,

Kun ang usa ka tawo nga namatay duna’y gibilin nga utang, ang iyang giutangan makapaningil gihapon niini ug ang bayad adto kini kuhaon sa iyang gibilin nga kabtangan kon estate. Ikaw isip bugtong sumusunod mahimo ka nga mo-inherit sa kabilin sa imong nanay apan kinahanglan nga imo una nga bayran ang iyang utang ug ang sobra niini maoy mapunta kanimo. Ang maayo nimo nga buhaton mao ang pagpakigkita sa giutangan sa imong nanay. Kun aduna kay kwarta mahimo nimo siya’ng bayran base sa ilang nasabutan, apan kun wala kay kuwarta, mas maayo nga imong sultian ang giutangan nga imong ibaligya ang property aron imo siya’ng mabayran sa utang ug ang sobra sa halin maoy magsilbi nimo’ng bahin. Mas maayo nga imong bayran ang maong utang sa dili pa mo-expire ang term niini base sa ilang nasabutan aron dili ma-imbargo sa giutangan ang yuta sa imong inahan. Thanks and God Bless. -Atty. Divine

Alang sa imong pangutana, ipadala lang sa Legal Corner sa Banat News or email sa [email protected] ug akong tubagon ang inyo’ng pangutana pinaagi sa akong column matag Miyerkules ug Domingo.