EDITORYAL - Sayop nga pamaagi

“Wrong choice of procedure.” Mao kini ang pamahayag nga gibuhian ni Senador Ferdinand “Bongbong” Marcos dihang gikuhaan og pamahayag kung nasayop ba si Presidente Benigno Aquino III sa iyang desisyon o ang gipili nga mga amigo.

Si Aquino namahayag nga sayop nga mga impormasyon ang gihatag kaniya sa gitaktak nga kanhi director sa PNP-Special Action Force nga si Gen. Getulio Napeñas kalabot sa nahitabo sa Mamasapano nga gikamatay sa 44 ka polis.

Nahitabo na man na, angay manubag ang sad-an. Kun kinsa ni sila ang Board of Inquiry (BOI) na maoy bahalang moila kanila aron sila pasakaan og kaso.

Daghang miinsister nga si Aquino angay mabasol tungod sa paghatag niya og pagtugot nga mag apil-apil sa operasyon ang suspendidong si kanhi PNP Director General Alan Purisima, butang nga gihimakak sa heneral.

Klaro na man kaayo base sa nanggawas nga mga pamahayag sa tanang nalambigit sa operasyon ilabi na sa mga labaw sa PNP, sa SAF, sa AFP ug bisan na gani kang Interior Secretary Mar Roxas , murag sila si Aquino, Purisima ug Napeñas lang ang nasayod sa operasyon.

Wala pahibaw-a ang OIC PNP Chief nga si Director General Leonardo Espina ug bisan na gani ang kadagkoan sa Armed Forces of the Philippines o ba kaha si Roxas kabahin sa Oplan Exodus.

Kun sabton ang pamahayag ni Marcos, masabot nato nga wala untay problema kun nilampos pa ang operasyon sa ‘procedure’ nga gipili ni Aquino.

Apan karong duna nay nahitabo sa mga polis, nag-iyahay na lang sila og luwas sa ilang kaugalingon. Ang nadut-an mao si Napeñas.