Utang sa PO card

Dear Atty. Divine,

Ang akong suliran kabahin kini sa akong utang sa P.O. card kay karon naglisod nako og bayad. Mihangyo ko sa guarantor sa P.O. card nga data-datahan na lang nako kay miabot na man og P50 mil ang akong utang.

Ang akong nabayad niya P8 mil pa. Karon misugot siya sa akong hangyo apan ang iyang kondisyon nga kadto’ng akong nabayad nga P8 mil isipon na lang kadto nga bayad sa penalty o interest busa magpabiling P50 mil ang akong utang. Ako siya’ng gihangyo nga kadto’ng partial nga akong nabayad niya i-deduct usa kadto sa akong utang ug ang penalty ako unta paminosan ug ako lang unya bayran inighuman nako og bayad sa capital, apan wa siya mosugot. Unsa may angayan nako nga buhaton? Makapugos ba siya pagpabayad nako og P8 mil nga interest sa akong utang? - Tony

* * *

Dear Tony,

Pasabta lang ang imong giutangan nga apiki g’yud ka karon sa kuwarta apan andam ka nga mobayad kutob sa imong makaya matag buwan. Mas maayo nga imong ipresentar kaniya kun pila’y makaya nimo nga bayran matag buwan sa imong utang ug kun pila ka buwan nimo bayran ang kinatibuk-ang utang. Samtang kalabot sa penalty o interest kun dako ra alang kanimo ang P8 mil mas maayo nga mopresentar ‘sab ka niya og counter offer kun pila ug imo ‘sab siya hangyuon. Kana’ng pagpatong og interest sa utang mahimo man kana apan kinahanglan nga aduna mo’y kasulatan nga naglatid kun pila ka porsiyento matag buwan ang interest sa maong utang ug kinahanglan nga pinirmahan ug giuyunan ninyo’ng duha. Mas maayo nga magsabot-sabot lang kamo aron pag-areglo sa maong problema ug kalikayan ang pagdangop sa Korte . - Atty. Divine