Haytek nga way elektroniks

Kun kahaytek sa mga nasud ang hisgutan, di gyud magpalupig ang mga estado sa Amerika. Kay sa Greenbank, West Virginia, maoy dapit diin nahimutang ang kinadak-ang 'astronomical telescope' sa tibuok kalibutan.

Di kini makalingaw sa mata, kay ngitngit ray makita ug mga tingog nga naghatud og tulukibong mensahe sa mga kalihukan didto sa kawanangan  o kinalay-ang espasiyo (deep space). Gideklarar kining dapita nga 'Quite Zone' tungod sa hilabihang ka sensitibo niining maong kahimanan.

Niadto pang 1950, sulod sa nasakop nga lugar ining 13,000 sq. miles, estrikto gipatuman nga kanunay gimonitor, nga way makasulod o makapuyo  didto kun mogamit ka’g mga kahimanan nga may 'electomagnetic devices' o 'electronic gadgets' sama sa 'microwaves oven, TV, wifi, celpon, internet, etc.

Sagad sa komunikasyon didto mga karaang radyo lay gigamit, ilabi na sa ' 'law enforcers'. Gituyo kini aron pagsekyur sa operasyon sa teleskopyo. Kay ang mga 'airwaves' nga madetek, makasamok man sa higanteng teleskopyo.

Gituohan nga way mamuyo ining dapita tungod sa kalaay o kamingaw, kaylagi ang gidiling mga 'electronic gadgets', nahimo nang kabahin sa atong kinabuhi. Apan duna diay uban nga kinaham kaayo puy-an ang maong lugar.

Sagad sa nanimuyo didto, mga tawo nga dili gusto mabiktima o may sakit na tungod sa epekto sa 'electromagnetic radiations'.

Dinhi sa atoa,  gihan-okan kita sa tanang palibot ug  nabantang sa grabeng mga 'radiations'.

Nalipay kita nga ang Pilipinas, ginganlan nga usa ka celpon capital (cellular phones), apan adunay makasagmuyong epekto nga makadaut sa panglawas. Makakanser sa utok ug talandugong lawas nga di nato dihadiha mabatyagan.