Mga remedyo sa Almoranas (2)
Ang nahaunang mga remedyo nga atong nahisgutan sa gisundan aning isyu karon, mao kadto’y napilian nato nga paspas makapa-alibyo sa kasakit ug pagpakupos sa butbot o almoranas. Mahimo sad magdiskubre mo og laing pamaagi nga mas gituohan ninyong makahupay sad, kay i-share nato sa uban.
*COCONUT OIL (Lana sa lubi) – Patuhopa ang gapas sa lana sa lubi, unya ipahid sa nagbudlot nga kibot. Puwede kapila ka beses hunaran o butangan og lana sud sa 1 ka adlaw, hangtud pipila ka adlaw mohupay na.
*ALOE-VERA – Pagkuha og palwa niini nga hiwaon, unya kuhaa ang krema o unod niini nga idirekta pagpahid sa butbot o kibot nga gi-almoranas. Balikan na pud nga pahiran kun medyo mauga-uga na nga mokatol o mosakit pa.
Naa pay daghang remedyo nga tambal sa botika, nga mapilian ninyo. Mas maayo ipadoktor na, kun ugaling dina mada’g remedyo, nagkinahanglan na nga operahan. Apan bentaha gayud nga panagan-an nato nga dili kita mataptan aning sakita pinaagi nga;
*Mokaon permi og utan, bungahoy, ug mga prutas. Pulos kini adunay ‘fiber’ nga mopahilis sa kinaon, aron dili mogahi ang hugaw, nga sa sigi’g utong masamad ang butbot sa ilawom ug sa gawas nga bahin sa kibot. Mao kanang magdugo, hangtud manghubag nga mobudlot ang butbot nga haskang sakita.
*Moinom og daghang tubig aron di kaayo mogahi ang hugaw inig kalibang.
*Moinom og Virgin Coco/Olive Oil (1 ka kutsara) 3x a day human og kaon.
*Di palabi’g kaon sa mga karne kay dugay ni hilison (8-10hrs), mopagahi kana sa hugaw mong morag matastas ang butbot ug kibot inig kalibang.
*Di manihapon lapas 6-7pm, kay wa nay oras sa paghilis kun makatug na.
- Latest
