Unsa na ni uy!

Wala g’yud ko masayop. Nakakita g’yud og basehanan ang Ombudsman nga angay’ng imbestigahon si Vice President Jejomar Binay ug kaubanan sa pagpaburot sa kantidad pagtukod sa Makati City Parking building.

Ang mga sakop sa Ombudsman Special Panel of Investigators mihukom nga ipahigayon na ang preliminary investigation sa kaso batok sa bise presidente, sa iyang anak nga karon mayor sa Makati City si Junjun Binay ug 22 ka laing mga kauban.

Ang kaso nga ilang atubangon sa Ombudsman mao ang Malversation, Falsification, kalapasan sa Section 3 (e) sa Anti-Graft and Corrupt Practices Act ug paglapas sa Government Procurement Reform Act.

Daghang mga opisyal sa Makati City ang gilambigit sa mao nga kaso kay sila maoy nag-aprobar sa kontrata nga puwerte kamahal ug klaro kaayo nga gipaburot ang kantidad.

Walay labot ni Binay, ang ubang mga akusado mag-atubang usab og kaso nga administratiba nga Grave Misconduct, Serious Dishonesty ug Conduct Prejudicial to the Best Interest of the Service.

Girekomendar sa Special Panel of Investigators nga ang mao nga mga opisyal ibutang sa preventive suspension samtang magpadayon ang paghusay sa kaso nga administratiba. Kana maoy husto nga buhaton aron dili nila maguba ang mga dukomento nga magamit sa ebidensya.

Ang pagtukod sa Makati City Parking building nahimo atol nga si Binay mao pa ang mayor sa Makati. Nahibaw-an sa Ombudsman nga ang mga opisyal sa Makati mi-award sa kontrata sa kantidad og P11.9 milyones alang sa paghimo sa desinyo sa building ug ubang architectural services nga walay bidding.

Pastilan, mura’g maigo niini si Binay sa gipasiatab nga slogan “Ganyan kami sa Makati.”  Daghan pa g’yud kaayo ang nadiskobrehan sa Ombudsman. Kun atong tagsa-tagsaon, dili maarang dinhi sa atong luna.

Sa imbestigasyon unya, imatuod sa mga sakop sa Special Panel of Investigators sa Ombudsman nga hilabihan kamahal ang kantidad sa pagpatukod sa Makati City Parking building nga gigastohan kuno’g P1.5 Bilyones.

Ang pasiuna nga bana-bana ang mao nga parking building anaa ra sa P245 milyones ang kantidad.

Gihatag ko kini nga kasayuran kay kanunay ra ba nako kini nga gihisgutan sa nanglabay nako nga mga lindog. Dili ba kaha ngilngigan si Binay nga maghuna-huna kun molansar siya pagka presidente unya nag-atubang siya’g kaso sa Ombudsman?

Aw malagmit, moingon na ‘sab si Binay nga gigukod siya sa administrasyon. Apan matud sa panultihon “tell that to the dead marines” o kaha sa nangamatay nga SAF 44.