Ang kapintas sa bagyong Yolanda

Nobiyembre 8, sa milabay’ng tuig daghan ang nangamatay ug nawad-an og pinuy-anan sa bagyong Yolanda nga miigo sa northern Cebu, Tacloban, Samar ug Negros. Kun wala mawad-i og pinuy-anan nangagusbat ug nangaguba gyud ang kabalayan sa mga biktima. Nalupad gyud ang atop namong sin ug nahagsa didto sa kaumahan.

Ang bungbong usab nga hardiflex wala tuohi ni Yolanda gibuslot niya ug gilangkat usab niyang pultahan sa among igbaw. Mao usab ang kabalayan sa among silingan gipanglupad ang ilang kaatopan gumikan sa naghaguros ug nagtingog nga hangin. Ang balay sa among silingan giibot ug gidakdak taliwala sa karsada.

Hangtod karon, daghan pang kabalayan sa nagkalain-laing dapit sa San Remegio ang wala pa ma-repair gumikan sa kawad-on ug kahagip-ot sa kuwarta karong panahona.

Mas kusog pa ang bagyong Yolanda kay sa bagyong Ruping kaniadtong 1991. Sukad sa akong pagkatawo sa 1952, kato pa gyud ko nakasaksi og usa sa mga biktima sa bagyong Yolanda nga gianggaan og ‘supertyphoon’.

Labing subo nga palandongon mao ang daghang nangamatay sa Tacloban, Leyte nga mikabat og sayes mil kapin kon kulang ka mga kinabuhi gumikan sa ‘storm surge’ atol sa bagyong Yolanda.

Manghinaot kita ug mag-ampo ngadto sa Kahitas-an nga wala nay laing bagyo nga sama kapintas sa Yolanda ugma damlag!