Roxas giatake’ng Binay

Wala na g’yud makapugong si Vice President Jejomar Binay kay misugod na siya sa pagpangatake ni DILG Secretary Mar Roxas nga posible’ng maoy iyang higpit nga kontra pagdagan niya pagka presidente sa eleksyon karong sunod tuig.

Mura’g tan-aw nako nasayo-sayo ang kumbati nila ni Roxas ug Binay. Gipanid-an nako pag-ayo ang mga lihok ni Binay kun unsaon niya pagkumbinsir ang katawhan nga siya pilion nga sunod nga presidente.

Napul-an na tingali sa pagpahigayon og “boodle fight,” kini’ng magkinamot nga magkaon nga klaro kaayo’ng propaganda lang, nangatake na g’yud pagsugod si Binay. Sa report, didto niya giatake si Roxas sa Pangasinan.

Puwerte’ng lagota ni Roxas pagkasayod nga miluwat og pamahayag si Binay nga ang nasud kuno nakakita na sa pagdumala sa DILG secretary tungod sa “misencounter” nga mikalas sa kinabuhi sa 44 ka sakop sa PNP Special Action Force (SAF).

Klaro man kaayo nga namolitika si Binay niini kay wala malilong sa katawhan atol sa Senate hearing nga si Roxas wala gayud pahibaw-a nga adunay operation ang SAF pagdakop ni Marwan ug kauban nga mga banggiitang terorista.

Ang argumento ni Binay nga kay ang PNP-SAF ubos man sa pagdumala sa DILG, nasayud g’yud si Roxas sa kalihukan sa kapolisan nga ubos sa iyang pagdumala. Mura’g misumbalik kang Binay ang iyang argumento.

Matud ni Roxas nga kun ingon niini ang argumento ni Binay, nasayud g’yud diay siya sa mga tinonto sa Makati City diha’ng siya pa ang mayor. Kini sama sa pag-overprice sa pagpatukod sa Makati City Parking Area ug Makati City Science High School.

Kini’ng mao nga mga isyu giimbestigahan sa pagka karon kay dako ang pagduda nga si Binay nakabahin og dako’ng kantidad gikan sa gipaburot nga kontrata sa pagtukod sa mao nga mga proyekto diha’ng siya mayor pa sa Makati.

Gawas sa mao nga kuwestyonable nga proyekto ubos ni Binay kaniadto, gikataho usab nga si Binay nakapanag-iya og 300 hektareyas nga hacienda ug daghan pa nga katigayonan nga wala malakip sa iyang dukomento.

Ang nindot nga buhaton ni Binay mao ang pagbutyag og mga anomaliya ni Roxas, kana kun dunay anomaliya ang DILG secretary. Karon una pa niya nga pangatake kang Roxas, misumbalik kaniya ang epekto.

Mosamot ang akong pagtuo nga tungod niini, si Roxas mopahugot pa gayud sa iyang bakus ug moatbang na ni Binay sa pagdagan sa pagka presidente. Para kanako, lupigon g’yud si Binay ni Roxas kay daghan siya’g isyu, ug si Roxas wala.