Mingaw na man ang FOI bill

Daghan na ang gikalingawan sa atong Kongreso karon. Among others, gawas sa Maguindanao massacre, anaa ang emergency power nga gipangayo ni Presidente Noynoy Aquino.

Unya ambot kanus-a mahuman ang hearing batok ni Vice President Jejomar Binay, ang pagpadayon unya sa kaso sa P10 billion pork barrel scam, ang offensive nga gihimo karon sa kasundalohan batok sa Bangsamoro Islamic Freedom Fighter (BIFF) sa Mindanao, ug ang gisugyot nga balaud sa Bangsamoro, kon Bangsamoro Basic Law (BBL).

Mahitungod sa BBL, all of a sudden nahimo kita’ng mga eksperto sa pamalaud, ug sa Constitution. Tanang mga radio-TV commentators ug mga newspaper columnists, suheto na kaayo sa Constitution, sila na ang husto, unconstitutional ang BBL, ug dili na gayud makab-ot ang tiunay nga kalinaw sa Mindanao.

Busa, alang nila, di maayo’ng palutson ang BBL. Na hala, kamo na la’y pagbuot. Kun tumanan kamo sa inyo’ng gusto, unsa may alternative sa BBL? Unsa may laing paagi pagkab-ot sa kalinaw sa Mindanao? All-out war? Unya, apil mo?

Ug bahin sa FOI bill nga medyo napadaplin na, gumikan sa daghang lingaw karon sa Kongreso, mag-Lenten Break na ra ba unya, ug wa usab kini isipa sa Malacanang nga urgent bill, dako ang atong kabalaka nga dugay-dugay pa kini’ng molusot, kun molusot man.

Mura man og dili enteresado si Presidente Aquino niini, usa ra ba unta kini sa iyang mga election promises, ug karon, iya na lang gilimut-limotan. Utro pud ang Kongreso ug ubang kadagkoan sa gobiyerno, mura og dili gusto’ng mahimo’ng balaud ang FOI bill.

Na-approve na kini sa House committee on public information, ug matud ni Rep. Ibarra Gutierrez, “this is not a toothless version” Sa ato pa, mamaak g’yud ang maong bill kun mahimo nang balaud. “This is a strong version that can strengthen transparency in governance, not only for the media but the public in general,” padayon ni Gutierrez.

Ang balaud unya, mopugos sa tanang opisyales sa gobiyerno pag-upload sa ilang statement of assets, liabilities and net worth (SALN) sa ilang website, “without necessitating a request for such data.” Sa ato pa, di kinahanglan nga dunay mo-request pagpabutyag sa ilang SALN.

Adunay dugang sugyot nga klarohon g’yud sa balaud nga ang SALN sa tanang public officials “be made available to the public at any time.” Mao ba ni ang gikahadlokan sa atong mga magbabalaud, ngano nga bugnaw kaayo sila pagpalusot sa FOI bill?