EDITORYAL - ‘Police Scalawags’

Dunay siyam ka mga polis sa Cebu City Police Office nga giingong mga ‘scalawags’ o kadtong mga nagpabadlong sa serbisyo.

Matud pa ni Konsehal David “Dave” Tumulak kining maong mga pangalan gikan sa mga text messages sa mga concerned citizens nga hilom nga nag-obserbar sa ilang komunidad.

Kini gi-text sa text hotline sa City Command Center.  Hinuon subject pa kini sa lawom nga imbestigasyon ug beripikasyon.

Apan dili lang man siguro siyam ray nalambigit niining mga binuang ilabi na kanang hulidap, drug protectors, pagpanguha sa mga butang sa ilang mga dinakpan ug kadtong dili mouli sa ma-recover nga kinawat nga kwarta o mga butang sa mga biktima.

Duna pay daghan nga posibleng wa pa maapil sa maong listahan. Unsa na lang kahay buhaton sa ilang mga anak ug pamilya kun mahibaw-an sila sa ilang pagbulingbuling sa ilang uniporme?

Hinuon bisan wala sila pangalani sa mga balita, apan karong mga orasa nag-alindasay na kining mga polisa sa ilang pagkatulog ug  bisan sa ilang pagmata gumikan kay nasayod man ni sila nga sila maoy gipasabot niini.

Apan inay nga mohimo dayon og aksyon, gihagit na man hinuon ni acting city police director sa Cebu City Police Office , Senior Superintendent Conrad Capa, ang mga tawong nasad-an o nakahibalo sa mga binuang niining pipila ka sakop sa CCPO nga mobarog ug mosang-at og pormal nga reklamo.

Apan kinsa man gud intawon ang mangisog aron pagsanong sa hagit ni Capa? Tinuod maduhi’g ang pangalan sa organisasyon tungod sa binuang sa pipila nila ka sakop apan nganong dili na lang silay mo-countercheck sa maong report?