Pangespiya sa Mindanao

Bisan sa pagsumiter na sa transcript sa binayloay sa text messages nilang Local Government Secretary Mar Roxas, Direktor Heneral Alan Purisima ug ubang protagonista sa kontrobersiya sa Mamasapano, Maguindanao, gipahinumdoman ni Senador Loren Legarda ang nagduma sa imbestigasyon sa Senado nga si Senador Grace Poe sa pagkuha sa mga dokumento gikan sa mga kompaniya sa telepono.

Gitataw ni Legarda nga wa siya magduda sa kamatinud-anon sa transcripts nga gisumiter sa hingtungdang mga opisyal sa gobiyerno. Apan nitataw siya nga bugtong makapapas sa pagduda sa posibleng maniobra sa ilang imbestigasyon mao ang pagsumiter sa telcos sa aktuwal nga text messages ug voice calls mahitungod sa engkuwentro sa Mamasapano niadtong Enero 25.

  * * *

Ambot nahatag na ba sa telcos ang gipangayo sa mga senador. Nitataw si Poe nga wa na siya kakita og panginahanglan sa pagpahigayon og laing public hearing sa imbestigasyon nga pormal na niyang gitak-opan sa niaging semana. Mahimo hinuong mahisgutan ang mga dokumento sa telcos sa report sa Senate Committee on Public Order.

Nitumaw human sa imbestigasyon sa Senado nga kuwang ang transcripts nga gisumiter nilang Roxas, Purisima ug kaubanan. Gawas nga way time stamp ang pipila, may mga mensahe pa gyud nga wa iapil, labi nang alang ug gikan ni Presidente Noynoy Aquino.

* * *

Bisan di masukitsukit sa mga senador si Aquino labot sa Oplan Exodus, malili unsa kadako ang papel nga iyang gihuptan pinaagi sa text messages ug voice calls niadtong adlawa. Di mabasol ang mga senador nga interesadong mahibawo unsay nahibaw-an, unsang orasa unang napahibawo ug unsay gihimo ni Aquino human nahibawo nga naapiki ang mga sakop sa Special Action Force (SAF) human nila napatay ang gikaintapan nga terorista nga si Zulkifli bin Hir alyas Marwan.

Kini bisan wa makapakita og bisan unsang ebidensiya ang mga namasangil nga gimandoan ni Aquino ang militar sa di pagtabang sa gipamatay nga SAF commandos sa kahadlok nga maguba ang ceasefire uban sa Moro Islamic Liberation Front (MILF).

* * *

Niangkon si Poe nga wa pa motubag ang telcos boluntaryo ba nilang ihatag ang gipangayo nga mga dokumento. Magsabot pa sab ang mga senador kun modangop ba sila sa korte aron pagpamugos kun mobalibad ang telcos.

May lain hinuong posibleng tinubdan sa kasayuran ang mga determinadong motukas sa misteryo sa Mamasapano. Naapil sa expose ni Edward Snowden, ang whistleblower sa National Security Agency (NSA), nga nabiktima sab ang Pilipinas sa pagpangespiya sa Estados Unidos pinaagi sa NSA program nga MYSTIC nga makakuha sa metadata (oras ug mga dapit nga gitawgan ug gigikanan sa tawag) ug sa mas bag-ong programang SOMALGET nga maka-record sa audio sa tanang tawag sa telepono. Matud ni Snowden usa sa tumong sa pagpangespiya mao ang Mindanao. [email protected]