EDITORYAL - BIFF nanganak

Nanganak na sab og laing grupo ang teroristang pundok nga Bangsamoro Islamic Freedom Fighter (BIFF) nga gitawag karon og Justice for Islamic Movement (JIM).

Sumala pa sa report, usa ka Muhammad Ali Tambako ang nangulo karon sa maong bag-ong grupo ug giingong mao karon ang nagtago kang Basit Usman ug uban pang teroristang pundok gawas sa BIFF. Sama sa nahitabo kaniadto sa Moro National Liberation Front ug Moro Islamic Liberation Front dunay kasungian ang liderato sa BIFF nga si Ameril Umbra Kato ug si Tambako hinungdan nga mibuwag ang naulahi kang Kato. Ang BIFF gikan kaniadto sa MILF.

Samtang nagkadaghan ang mga grupong kaaway karon sa gobiyerno sa Mindanao nagkaanam og kahuyang ang political weight sa maong mga pundok , nagpasabot kini nga sila-sila dili mahimong magkauban og dugay. 

Kining JIM kinahanglang trataron gihapon sa gobiyerno sama lamang sa pagtratar niini sa BIFF  isip usa ka teroristang pundok.

Nagpasabot kini nga sila mga bandido ug walay political value ang bisan unsa pa mang ilang ipangangkon nga baruganan  dili sama sa na-enjoy karon nga atensyon sa MILF ug MNLF nga dunay political  value ang ilang posisyon.

Kun ingon niini lang ang pagtagad nga buhaton kanila (BIFF ug JIM ug Abu Sayyaf) maglisod sila pagpanghaylo og mga bag-ong miyembro ilabi na kun dili lung-an sa militar ug kapolisan ang paglutos kanila. Karon aduna pay laing grupo nga gisubay ang awtoridad nga giingong adunay koneksyon sa Islamic State of Iraq and Syria (ISIS). Apan wa pay klarong impormasyon kabahin sa maong grupo.

Kung dili tarungon sa gobiyerno  ug sa mga magbabalaod ang kontrobersyal nga Bangsamoro Basic Law dunay posibilidad nga maghiusa kining tanang mga grupo nga mas ngilngig pa unya sa naandang mga rebeldeng Muslim sud sa nanglabay nga upat ka dekada.