Paborito’ng proyekto sa DPWH

Dili na matago sa katawhan ang panagkunsabo sa mga opisyal sa Department of Public Works and Highways, sa mga kontraktor ug mga politiko niining ilang proyekto’ng mga karsada nga wala kinahanglana sa katawhan. Hangtud kanus-a kaha moutong ang mga tawo niini’ng klaro na kaayo nga paggamit sa atong mga karsada sa kurapsiyon sa DPWH?

Daghan pa kaayo’ng mga panginahanglanon ang mga tawo, apan ang kuwarta gikan sa buhis sa katawhan anaa gibubo sa pagpamaklas sa mga karsada’ng maayo pa unta kaayo og mga kondisyon.

Pila pa ka barangay ang wala, ug nagkulang og mga classrooms, health centers, merkado, sports complex ug mga farm-to-barangay roads. Nagpabilin kini nga wala matagad kay ang nasyonal nga kagamhanan tua motutok pagbubo og pundo sa pagsemento ug pagpaaspalto sa mga maayo pa nga karsada.

Sama pananglit sa lungsod sa Minglanilla, nindot pa kaayo ang karsada apan gibaklas sa DPWH pinaagi sa pribado’ng kontraktor aron lang sementohon ug aspaltohon og balik.

Wala hinuon ko masayod kun aduna bay koordinasyon sa munisipyo sa Minglanilla ang pagpamaklas, apan sa Facebook page sa “I Love to Serve Minglanilla” naglagobo ang reklamo sa mga tawo.

Ang Minglanilla naila nga usa sa labing traffic nga lugar sa Metro Cebu gawas sa Cebu City, apan gisamotan ang sitwasyon sa trapiko sa pagpamaklas sa DPWH. Gawas pa, nasayod ang mga opisyal sa Minglanilla nga hapit na ang Kabanhawan Festival atol sa Sugat (Easter Sunday sunod bulan), unya ang karsadang gibaklas anaa pagasugdi duol sa Simbahan ug sa eskina paingon sa Ward 1 diin mahimutang ang Minglanilla Sports Complex.

Ang publiko nakakita sa mga semento nga hilabihan pa kabaga ug kanindot sa kondisyon apan tuyoon lang g’yud og ukal. Sa akong tan-aw, ang semento molungtad pa unta bisa’g 20 ka tuig.

Ang akong nahibudngan nganong hangtod karon, wala pa may mireklamo’ng lokal nga opisyal. Lisod hinuon ituo nga adunay mga lokal nga opisyal nga nakakuwarta niini’ng binuang sa DPWH tungod kay wala may ebidensiya, apan makapahibulong ngano’ng ila kini’ng gitugotan.

Tay’m pa ra gud, ngano’ng matayming man ang pagpaayo sa maayo pa nga mga karsada sa mga bulan nga hapit na ang eleksiyon?

Kaniadto’ng nag-estudyo pa ko sa Investigative Journalism sa Philippine Press Institute, usa sa mga eksperto miklaro g’yud namo nga “in road, there is money.” Sa binisaya pa, adunay kuwarta sa karsada. Iyang gi-esplikar nga ang karsada maoy paborito’ng proyekto sa DPWH, sa mga kongresista, ug sa mga lokal nga politiko.

Kay malampuson man ang administrasyong Aquino sa pag-solo sa tanang proyekto kay giwagtang man ang pork barrel sa mga kongresista, wala kita’y laing mapasanginlan niini.