EDITORYAL – Luwas nga biyahe

Ang kinabuhi sa mga sumasakay gitugyan na nila sa mga nagdumala og panakayan sa higayon nga motikang na sila sa damyo sa barko aron molawig sa kadagatan paingon sa lainlaing destinasyon. Niini’ng higayuna ang mga tagdumala og barko angay gayud nga mohimo sa tanan nila nga paningkamot aron luwas sa kanunay ang kinabuhi sa ilang mga pasahero samtang naglawig sila sa kadagatan.

Subo lang nga adunay ubang mga tagdumala ingon man mga opisyal sa barko nga danghag lang kaayo sa ilang mga trabaho ug usahay mas palabihon nila nga makakuwarta sila sa wala’y paghuna-huna sa dangatan sa ilang mga sumasakay.

Bisan bati kaayo ang panahon, ang ubang tagdumala og barko mosungasong sila sa pagbiyahe nga mosangpot usahay sa pagkalunod ug sa pagkakalas sa kinabuhi sa ilang pasahero.

Angay nila’ng sundon ang gihimo ni Chester Cokaliong nga mao gayud ang nangunay pagdumala sa mga barko sa Cokaliong Shipping Lines ug resulta, sulod sa 25 ka tuig niini nga panerbisyo wala gayud makasugat nga may nadisgrasya sa ilang mga barko.

Kini maoy rason nga ang shipping company nga gipanag-iya mismo sa pamilya ni Cokaliong nakadawat og daghang pasidungog sa nanglabay’ng katuigan gikan sa lainlaing ahensya sa kagamhanan.

Karong bag-o lang, ang shipping company ni Cokaliong gipasidunggan sa kagamhanan sa probinsya ug dakbayan sa Sugbo tungod sa nindot niini nga serbisyo. Bisan panahon sa gabii, kanunay’ng gimonitor ni Chester Cokaliong ang iyang mga barko nga maglawig sa kadagatan aron pagsiguro nga luwas ang ilang biyahe ug moabot kini sa ilang destinasyon.