Unsa’y tinuod?

Gitataw ni Cebu City Councilor Margot Osmeña nga wala g’yud siya mosupak nga mangutang ang dakbayan sa Sugbo og P120 milyones gikan sa Land Bank aron nga maka-avail kini og grant gikan sa World Bank.

Kun molampos nga makapangutang ang dakbayan gikan sa Land Bank gamiton kini aron maka-avail ang siyudad og grant gikan sa World Bank nga kantidad og P1.2 Bilyones sa pagpatukod sa bag-ong CCMC.

Nakabantay ko nga nasaypan lang si Konsehal Osmeña ug ang ubang mga konsehal sa Bando Osmeña Pundok-Kauswagan nga sila misupak tungod kay kontra partido man ni Mayor Michael Rama.

Apan alang kanako, si Konsehal Osmeña igo lang nagtuman sa katungdanan isip usa ka konsehal nga mangutana g’yud kabahin sa mga isyu nga gusto’ng paaprobahan sa City Council.

Kini gani maoy rason nga wala siya mosupak nga ang isyu kabahin sa gisugyot nga manghuwam og P120 milyones ang dakbayan gikan sa World Bank himoan kini og executive session karong Marso 25.

Atol unya sa executive session, imbitahon sa mga konsehal ang mga sakop sa Local Finance Committee sama sa city treasurer, budget officer ug planning and development officer.

Pangutan-on sila sa mga konsehal kun ngano nga kinahanglan pa man nga mangutang ang dakbayan sa Sugbo aron makapatukod og bag-ong ospital.

Si Konsehal Osmeña miingon nga nasabtan niya nga may kuwarta na ang dakbayan sa Sugbo nga ipatukod sa bag-ong ospital kay ang City Council mipagahin na og P600 milyones alang niini.

Unya si Mayor Rama mipahibalo na nga daghang mga kompaniya ingon man kahugpongan nga misaad nga motabang pagpatukod sa bag-ong CCMC.

Mao kini ang punto nga nakaingon ko nga dili angay’ng mabasol si Konsehal Osmeña nga mangutana g’yud. Mao kana ang trabaho sa konsehal kay kun maghilom-hilom lang ang konsehal wala g’yud na’y ayo.

Samtang gipasabot ni Mayor Rama nga kun makakuha ang dakbayan og “loan” gikan sa Land Bank nga katumbas sa 10 percent sa kantidad sa pagatukoron nga CCMC building, ang World Bank mohatag na sa 90 percent sa gikinahanglan nga kantidad.

Si Konsehal Osmeña miingon nga kun makontento siya sa pagpasabot sa mga sakop sa Local Finance Committee, dili siya mosupak nga mangutang ang dakbayan sa mao nga kantidad.

Apan ang pangutana ni Konsehal Osmeña kay ang himuong “collateral” sa dakbayan sa pagpangutang sa Land Bank mao ang 20 percent sa madawat niini nga Internal Revenue Allotment (IRA) gikan sa national government.

Sa ato pa, ang kapin sa P200 milyones nga katumbas sa 20 percent sa IRA share sa dakbayan, dili magamit hangtud maimpas ang utang sa dakbayan.

Kamo diha, uyon ba kamo nga mangutang ang dakbayan?