Sayop nga lakang

Katungod ni Dr. Christine Cempron ang pagpadayag sa iyang gibati nga kasuko ngadto ni Presidente Aquino tungod sa nahitabo nga pagkamatay sa iyang bana nga si PO3 Romeo Cempron nga apil sa 44 ka sakop sa PNP Special Action Force nga napatay didto sa Maguindanao.

Apan ang pagsalmot niya sa rally nga gihimo sa lainlaing grupo, apil niini ang mga “leftist,” dili g’yud tukma. Apan kay human na man, dili unta angay’ng usbon ni Dr. Cempron ang iyang gihimo.

Nasayud kita nga nahiubos g’yud si Dr. Cempron kang Presidente Aquino kay pag-abot sa mga napatay nga SAF didto sa kaulohan, wala dayon mosugat ang presidente.

Sa laktud, gibasol g’yud si Presidente Aquino kay siya man ang commander in-chief sa nasud. Apan ang isyu lagi, kinsa man ang ihulip nga presidente kun mo-resign si Noynoy? Si Vice President Jejomar Binay?

Wala pa man gani tubaga ni Binay ang mga gipasangil kaniya nga aduna siya’y anomaliya diha nga mayor pa siya sa Makati City. Anaa diha ang isyu kun ngano nga nagpadiki-diki si Binay sa pagtubag niini.

Lisud ba gud tubagon ang pasangil ni kanhi Vice Mayor Ernesto Mercado kun nagtumo-tumo lang kini aron dauton si Binay? Mao kana ang isyu karon nga daghan sa katawhan ang dili mosuporta nga pakanaugon si Noynoy sa katungdanan kun si Binay man lang ang ipuli.

Angay kini nga hinuktokan ni Dr. Cempron kay nagtuo ko nga human niya matimbang-timbang ang isyu, moabot ra sa iyang huna-huna nga diha na lang si Noynoy kay total eleksyon na man sa sunod tuig.

Bisan og mius-os na pag-ayo ang popularity rating ni Binay, apan nagpabilin pa nga siya gihapon ang labaw sa mga posible’ng mokandidato. Apan tan-aw nako, kun si Presidente Aquino motuboy na og iyang kandidato, anha nga mous-os na ang kainila ni Binay.

Tan-aw nako, si DILG Secretary Mar Roxas mao g’yud ang ituboy ni Noynoy aron mopuli kaniya kay pareho man sila nga sakop sa partido Liberal. Aw, wa g’yud hinuo’y isyu si Roxas, dili sama ni Binay.

* * *

Isip sakop sa Cebu City Council, si Konsehal Margarita Osmeña mangutana g’yud kun dunay dili kaayo niya masabtan sa mga isyu nga iduso sa konseho.

Kay sakop man lagi si Margot sa BOPK, madudahan g’yud siya nga namolitika. Unsa man diay, dili na lang siya motingog? Tan-aw nako, husto ra man ang gihimo ni Margot gawas kun gusto mo nga isipon siya nga sakop sa committee on silence.

Padayon Ma’am Margot sa imong pagsukit-sukit sa mga isyu aron ang katawhan masayod sa kamatuoran.