Resignation dili solusyon

Bisa’g unsaon nako og timbang-timbang, ang pagpaluwat ni Presidente Noynoy Aquino gikan sa katungdanan, dili maoy kasulbaran sa mga suliran nga ato karong gisagubang.

Una sa tanan, ang pagpa-resign ni Noynoy dili kini makahatag og hustisya o makahupay sa mga hingtungdan gumikan sa Maguindanao massacre.

Dili ‘sab ni makasulbad sa kagubot sa Mindanao. Dili makapa-surrender sa mga mipatay sa Valiant (dili fallen) 44. Dili makapabilanggo sa nagpasiugda sa nagpadayon nga atrocities sa Mindanao.

Dili makapalambo sa ekonomiya sa nasud. Dili makahatag og trabaho sa mga unemployed. Dili makasanta sa corruption. Dili makahipos sa mga criminal elements sa nasud. Dili makapanalipod sa environment. Dili makasanta sa climate change. Ug daghan pang “dili.”

Mao kini ang hinungdan nga dako’ng pakyas ang gihimo nga people power kay bisa’g unsa’y atong himoon nga mass action, kun wala kini mass support sa katawhan, dili kini magmalampuson.

Besides, mahinungdanon ang mga tawo, kinsa’y magpaluyo ug magpasiugda sa mass action. Kinsa man ni sila’ng buot magpa-resign ni Noynoy?

Nakaila mo nila? Nabalaka lang ko nga dunay pipila ka Obispo nga miduyog kanila. Kun buhi pa to si Cardinal Sin karon, lagmit gikasab-an na kini’ng maong mga Obispo.

Anyway, sa ako na’ng gibalikbalik dinhi, pila na lang ka buwan, election na. Manaug na si Noynoy. Ang angay nga buhaton sa mga tawo nga nag-awhag pagpa-resign ni Noynoy mao ang pagpalig-on sa kahigayonan pagdaog ni Vice President Jejomar Binay.

Ilang kuyog-kuyogan si Binay ni’ng iyang pagsuroy-suroy ug pagpanglamano sa mga botante sa nagkalainlaing dapit sa nasud. Di ba, ilang puy-an ang Cebu City ug province, kay sige mag balik-balik si Binay dinhi.

Anyway, ang perception sa tawo maoy mahinungdanon. Unsa may tan-aw sa katawhan sa pamunoan ni Noynoy? Naputos sa corruption? Nalambigit ba siya personally sa corruption?

Sayop ba ang iyang gihimo paggukod sa gidudahang mga corrupt officials sa gobiyerno?

Dako’ng problema karon ni Noynoy mao ang pagpili kinsa’y iyang ituboy sa umaabot  nga election. Kinsa ang makapadayon sa cleansing nga iya karong gihimo sulod sa iyang administrasyon.

Kun survey maoy basehan, mura’g wa pa’y makalupig ni Binay.

Sa ato pa, ang ituboy ni Noynoy, lagmit pildehon ni Binay? Mao ba kini ang perception sa katawhan, nga gumikan sa survey, si Binay maoy ilang ipuli ni Noynoy?

Sa laing bahin, unsa may sala ni Mar Roxas?

Dili ba maayo’ng himuon nga Presidente ang tawo nga subra ka buotan? Wala mahilambigit og corruption … hinungdan nga masaypan na lang nga weakling?