Mura’g walay utok

Gusto nako nga kumentaryohan ang gihimo sa mga sakop sa PROBE sa City Hall nga giabusohan ang ilang service nga sakyanan. Naglagot ko nga nakakita sa video nga gi-upload ni John Walt Bordario sa Face Book kaniadto’ng Miyerkules sa hapon.

Imbes nga panggaon nila ang ilang service vehicle aron nga kini magdugay, ang sakyanan gihimo na man hinuon nila nga backhoe ug maoy gigamit sa pagsige’g dumbol sa sementado nga koral aron matumba.

Dako’ng binuang ang gihimo sa mga sakop sa PROBE Team ug si Mayor Michael Rama angay’ng dili mopasaylo niini’ng mao nga mga kawani, ilabi na niadto’ng lider sa team nga nagsugo.

Nadunggan nako sa report sa radyo DYLA nga gipatawag ni Raquel Arce (hepe sa PROBE) ang mga hingtungdang kawani ug gipangkasab-an sa ilang “binugo” nga buhat.

Alang kanako, dili tukma ang kasaba alang sa mao nga kawani ug angay sila nga tangtangon sa ilang trabaho sa dakbayan. Dili na angay’ng maghuwat si Raquel Arce kun unsay himuon sa mga opisyal sa Human Resource Development Office. Mas nindot nga si Raquel Arce mismo maoy mangunay sa paghimo’g rekomendasyon nga ang mao nga mga kawani tangtangon sa ilang serbisyo kay nagpakauwaw lang sila.

Gawas nga gipakauwawan nila ang PROBE, mihimo pa g’yud sila og abuso sa property sa dakbayan. Nasayud ko nga si Mayor Mike Rama dili malipay kun makakita sa mao nga video.

Usa sa mga paagi aron pagtumba sa kural mao nga higtan kini’g pisi ug mahimo’ng ipaguyod kini sa sakyanan, dili kay padam-agan kini sa likud nga bahin sa cargo truck sa PROBE.

Resulta nakaangkon og kadaut ang likud nga bahin sa sakyanan. Kun ayuhon tingali sa pagtan-aw ang kinatibuk-an nga sakyanan, tingali aduna pay uban nga mga bahin niini nga nakasinati og kadaot.

Angay nga dili kini palabyon sa mga opisyal sa City Hall, ilabi na ni Mayor Rama.

(Kadto’ng gusto nga motampo sa Tingog sa Katawhan, ipadala lang sa email – [email protected] ug sa [email protected])