Panguykoy sa hustisya

Usa ka tuig na diay human nga giambus ang prominente nga abogado nga si Noel Archival ug mga kauban niini didto sa lungsod sa Dalaguete. Apan hangtud karon kamulong nanguykoy ang ilang mga pamilya sa hustisya.

Hinuon adunay gitumbok nga mga mamumuno ang mga imbestigador sa maong kaso. Ug sila mga opisyal sa Highway Patrol Group-7 sa Philippine National Police. Apan ang problema mao nga wala na sila igkita karon.

Asa na kaha nagluklok ang mga suspek? Mao kini karon ang nag-unang pangutana. Basin kun atua na sila mikagiw gawas sa nasud, ilabina nga wala pay hold departure order nga gipagawas ang korte batok kanila.

Hinuon, sa ako na nga giingon sa nakalabay’ng mga kolum, inosente pa kadtong mga suspek. Kini tungod kay wala pay desisyon ang korte kun sila ba gayud ang responsable sa kamatayon ni Archival ug sa duha niya ka kauban ug pagkaangol sa laing usa.

Apan niining ila nga pagsibat gikan sa HPG headquarters sa Campo Crame, dili usab nato malalis nga adunay magduda sa ilang pagka-inosente sa mao nga krimen. Kini ilabina sa mga pamilya niadtong mga biktima.

Agta ray nasayud kun kanus-a makab-ot sa mga pamilya sa mga biktima ang hustisya sa ilang linuog nga pagkamatay. Nasayud kita nga dinhi sa Pilipinas, haskang hinaya ang pagtuyok sa ligid sa hustisya.

Dili ba nga naabtan pa og subra sa usa ka dekada ang kaso sa pagpatay kang Alona Bacolod Ecleo una pa kini nadesisyonan sa korte? Dili ba nga hangtud karon wala pa gayuy katin-awan ang dagan sa kaso sa pagpatay sa batang si Ellah Joy Pique?

Duha lamang kini sa mga kaso dinhi sa Sugbo kansang ligid sa hustisya ang naghanot sa pagtuyok. Ug daghan pa nga mga kaso ang kamulong giabugan sa atong mga korte karon nga mora og wala nay kasulbaran.        

Apan manghinaut lamang kita nga masulbad sa dili madugay ang kaso sa pag-ambus kang Archival ug sa iyang mga kauban. Kini aron sa ingon nga makab-ot gayud sa ilang mga pamilya ang hustisya.