EDITORYAL - Asa man diay ang mga akusado?

Usa ka tuig na ang milabay sukad gibanhigan-patay si Atty. Noel Archival didto sa Coro, lungsod sa Dalaguete apan hangtud karon, wala pa gayud nakab-ot intawon sa iyang pamilya ang hustisya. Hinay kaayo ang pag-uswag sa kaso kay sa dihang nilusot na ang warrant of arrest batok sa mga suspetsado nga mga sakop sa Highway Patrol Group, wala na gani sila igkita.

Asa man diay sila? Nanago?

Ang mga akusado temporaryo unta nga gikustodiya sa holding center sa Camp Crame. Apan karon, wala na’y makasulti kung asa sila. Gani, sa paglusot sa warrant, ang Banat News nanawag gayod didto sa Camp Crame aron masuta kun tua ba didto ang mga akusado ug kun na-serve ba ang warrant. Nabalik ang warrant, wala didto ang mga akusado.

Karon, usa ka tuig ang milabay sukad sa pagbanhig-patay, nibahad na ang pamilyang Archival, pinaagi ni Cebu City Councilor Nestor Archival, igsoon sa namatay nga abogado, nga kun dili gani i-turnover sa mga opisyales sa HPG ang mga akusado hangtod Marso, i-apil na nila pagkiha ang mga kadagkoan sa HPG.

Angayan lang gayod nga himuon ning maong lakang sa pamilyang Archival kay mura na man og bugal-bugal ang gihimo sa ila. Tiaw mo na nga ang gitagaan og kustodiya sa mga akusado wala makahibalo og asa na sila karon!

Nakahibalo ang mga kadagkoan sa HPG nga kadtong mga akusado gipadala sa Camp Crame tungod kay nalambigit sila og krimen. Nakahibalo ang mga kadagkoan sa HPG nga dako ang posibilidad nga malusotan og warrant ang mga akusado. Nakahibalo sila nga kun molusot na ang warrant, i-serve gayod kini. Apan nagpabaya sila. Karon, nahanaw hinuon nga mura’g buwa ang mga miyembro sa HPG nga nalambigit sa kamatayon ni Atty. Archival!