EDITORYAL - Laway ray puhonan

Nagpista nga susama og mga iho o buwitre ang mga kaaway sa administrasyong Aquino tungod sa nahitabo sa Mamasapano, Maguindanao. Silang tanan gusto nga moligid ang ulo sa presidente kay lagi kuno, duna kini kasayoran, kontrol, sa napalpak nga operasyon. Subo kaayo nga nagamit sa “grandstanding” sa mga ambisyosong politiko ang pait nga nahitabo sa “Fallen 44.”

May dako pa g’yung purohan nga mapalid lang sa hangin ang 17 ka tuig nga kahago sa gobiyerno aron makab-ot ang kalinaw sa Mindanao gumikan sa panawagan nga ibasura na lang ang Bangsamoro Basic Law. Nagsusama og venue ang maong isyu alang niadtong mga gustong modagan og posisyon sa 2016 Elections. Ang tanang magbabalaod pulos nagpasikatay kun kinsa kanila ang maayong-laki.

Samtang ang uban may unod g’yud ang mga pangutana ug pamahayag, duna say uban nga mura lang og pagsamok-samok ang gibuhat.

Ang nakanindot niini,  duna nay kahigayonan ang mga tawo aron salaon og maayo kun si kinsa g’yud sa mga posibleng kandidato ang angayan nilang botaran karong 2016.

Ang labing maayong motubag, mohatag og maayo ug undanon nga pangutana matiman-an man sa mga tawo.  Ang maayong laki nga politiko kinahanglang motan-aw gyud sa sentimento ug dili lang sa baruganan sa kinabag-an .

Angayang makamao silang motimbang-timbang sa matag isyu nga nalambigti sa inquiry kay basin dili magkatukma ang ilang tubag sa baruganan o ba kaha sentimento sa mga tawo, duha ray ilang padulngan niini, madugangan o ba kaha makuhaan og supporters. Dili lang gyud unta kalimtan sa mga magbabalaod kun unsay katuyoan sa mga gihimong inquiries tungod kay makauuwaw kini sa mga nangamatay sa maong engkwentro.  Silang mga laway ray puhonan samtang ang nangamatay kinabuhi maoy ilang gisakripisyo.