Ayaw paglago-lago

Husto g’yud si Vice Mayor Edgardo Labella nga gibadlong niya ang pipila ka traffic enforcers dinhi sa dakbayan sa Sugbo nga magsul-ob lang og “lago” kon hugaw na nga sinena atol sa ilang pag-duty.

Tinuod, abog kaayo diha sa karsada apan dili pa kini hugaw tan-awon kun dili lang nimo ibalik pagsul-ob. Unya, aron malikayan ang mga aksidente kinahanglang magsul-ob sila kanunay sa reflectorized vest panahon sa gabii.

Kun magbarog ka diha sa karsada kinahanglan ka nga presentable tan-awon aron morespeto kanimo ang mga drayber. Unya dili kay mura ka lang og tawo-tawo sa humayan nga magbarog daplin sa karsada.

Ayaw ‘sab pagbarog nga anaa ka na taliwala kay makabalda ka sa pag-agi sa mga sakyanan. Sama sa ubang mga traffic aides sa Barangay Lahug nga magpatunga man usahay sa karsada nga magbarog.

Kaniadto diha’ng deputized agent pa ko sa Land Transportation Office (LTO), hitsas g’yud ko sa kahimanan. Flashing lights nga magkidlap-kidlap, flashlights aron sayon ra ang paggiya sa mga drayber panahon sa gabii ug uniporme. Kinahanglan nga “neat” ka tan-awon, dili kay ipabitay lang ang gisul-ob nimo nga uniporme. Kadaghan bitaw ko makakita nga “untidy” kaayo tan-awon ang ubang traffic enforcers.

Buyno, tumana ninyo ang awhag ni Vice Mayor Labella.

* * *

Mura’g daghan na ang nakabantay nga dili maayo’ng suportahan ang awhag nga pakanaugon si Presidente Aquino sa katungdanan kay ang mahitabo niini, si Vice President Jejomar Binay ang mopuli kaniya.

Nahimuot ko sa kaila nako nga broadcaster sa DYCM nga mipadayag sa iyang baruganan. Susama diay kami og baruganan. Kanang adunay panahon nga aduna ko’y ikahinabi, akong nasayran nga daghan na ang nakasabot.

Tungod sa daghang mga pasangil nga si Binay nalambigit og mga anomaliya, unya wala pa niya tubaga, daghan na nga katawhan ang wala ganahi kang Binay.

Mao na kini ang akong giingon kaniadto pa nga mas labing maayo g’yud unta nga gitubag ni Binay ang mga pasangil. Karon, kadaghanan sa mga tawo, wala na ganahi ni Binay.

Mosamot g’yud og hagba ang iyang kainila kun may mopahibalo na nga mosakbang kaniya. Wala pa g’yud hinuon mopahibalo, apan nagtuo ko nga si DILG Secretary Mar Roxas maoy mosakbang ni Binay. Para nako, nindot pa si Roxas kay walay anomaliya.

* * *

Kinsa kadto’ng adunay cellphone nga Nokia E-72 model nga wala na ninyo gamita, nagkinahanglan ko niini nga modelo sa cellphone para sa pag-report nako sa radyo. Tawga ko sa 0933-5700853.