Gisakyan og pamolitika

Unsa pa may punto ni Senador Nancy Binay sa iyang pagbitik kang Interior Secretary Mar Roxas ug Defense Secretary Voltaire Gazmin atol sa imbestigasyon sa Mamasapano encounter pinaagi sa pagpugos pagpatug-an nganong walay nakapahibalo kanila kang Pres. Noynoy Aquino?

Naklaro na hinuon nga gitapin-an ni Nancy ang presidente. Na-establisar na man sa miaging mga hearing ang buslot nganong walay gipadalang rescue operation ang kasundalohan nga nadestino duol sa Mamasapano, Maguindanao tungod sa pagdumili ni Noynoy pagpadala og military reinforcement.

Klarong pamolitika lang ang kang Nancy sa pagbitik kang Roxas ug ni Gazmin. Gusto niyang gub-on ang positibong imahe nga nakuha ni Roxas. Kini, human migawas sa imbestigasyon nga gituyo sa suspendido ug karon mi-resign nga PNP chief Alan Purisima pagsugo si Special Action Force chief Getulio Napeñas nga dili pahibaw-on si Roxas ug si acting PNP Chief Leonardo Espina. Pahibaw-on lamang sila kun tua na sila didto.

Unsa pa may tuyo ni Nancy?

Wala hinuon magpadala sa emosyon silang Gazmin ug Roxas. Wala nila awaya ang senadora nga anak ni Bise Pres. Jejomar Binay. Si Binay ug Roxas maoy gipaabot nga magkasakbang sa 2016 presidential elections. Ang ako lang unta, dili sakyan og pamolitika ang imbestigasyon sa insidente sa Mamasapano. Malawgaw ang tumong ug tuyo sa imbestigasyon nga mao ang paglugit aron makit-an nato ang kamatuoran sa hitabo.

Kinahanglang masayran sa mga Pilipino ang kamatuoran aron kita magiyahan kun angay pa ba ipasar o angay na ba nga ibasura sa hingpit ang Bangsamoro Basic Law.

Ang kinabuhi sa 44 ka SAF commandos mao ang naghatag kanato og yawe aron mabuksan ug mahibaw-an ang tinuoray’ng kolor sa   kaigsuonan natong mga Muslim sa Mindanao nga nagtawag sa ilang hugpong og Bangsa Moro.

Ang pagkaluog nila maoy nakahatag og kaisog sa atong mga magbabalaod – sahi lang niadtong mga nag-grandstanding – sa pagbarog batok sa BBL. Matud nila, kun dili kasaligan ang mga Bangsa Moro, walay rason nga makigsabot ang nasud kanila alang sa kalinaw.

Migawas karon ang pangutana nga kun masabot ang Moro Islamic Liberation Front, ang Bangsamoro Islamic Freedom Fighter na ba usab ang angay natong pakigsabotan? Human sa BIFF, kinsa na man sad nga grupo atong sabotan?

Gibutyag ni Senador Allan Peter Cayetano nga kun mapasar ang BBL, obligado ang Pilipinas paghatag og P7 bilyones ngadto sa MILF, ug sundan og P2 bilyones matag tuig hangtod sa ikalimang tuig. Mao ba kini ang atong bayad kanila nga nagkasabot kita alang sa kalinaw? Mao ba kini ang bayad sa Pilipinas bugti sa kinabuhi sa mga sundalong Pilipino nga gipanglunggoan og ulo? Mao ba kini ang atong bayad alang sa kinabuhi sa 44 ka SAF commandos nga gipang-ihaw, gipangtiwasan bisan nagkirig na, gipamutlan og ulo, gipangkawatan sa mga gamit.