EDITORYAL – Kodeta di maayo

Angay’ng magmatngon karon ang kadagkoan sa militar, kapolisan ug katawhan niini’ng awhag nga sakmitan sa gahum si Presidente Aquino pinaagi sa coup d’etat. Ang coup d’etat molampos lang kun magkahugpong ang kapolisan ug militar unya adunay suporta sa katawhan sama sa nahitabo kang kanhi Presidente Marcos niadto’ng 1986.

Makahatag lang kini og dugang gubot sa atong nasud. Ang termino ni Presidente Aquino kutob na lang sa Hunyo 30, 2016, dili na ba gayud kita makapaabot niini?

Daghan ang gipanguyawan nga kun mahitabo ang coup d’etat ug matangtang sa gahum si Presidente Aquino basin og ang ipuli kaniya mao si Bise Presidente Jejomar Binay nga gipasanginlan og daghang anomaliya ug wala gayud niya tubaga.

Dili imposible ang pagduda sa uban nga ang mga dumadapig ni Binay maoy dako kaayo og tinguha nga mahitabo ang coup d’etat aron nga mapadali ang paglingkod ni Binay sa Malacañang.

Ang kadagkoan sa kapolisan ug militar mipasalig hinuon nga sila nagpabilin nga loyal ngadto sa kagamhanan ug nagpasabot nga dili sila mosuporta og coup d’etat.

Sa coup d’etat ang kadagkoan sa kapolisan ug militar mao ra unya ang magbuot kun kinsa ang palingkuron nga pangulo sa nasud. Ang labing maayo mao nga huwaton na lang nato ang eleksyon unya sa Mayo sunod tuig.

Kinahanglan nga ang mga botante mohashas na gayud sa mga kandidato nga adunay katakus sa pagdumala sa nasud ug mopatigbabaw sa kaayohan sa katawhan, dili kay ang pagpadato sa iyang kaugalingon.