Presyo sa fuel misaka na ‘sab

Gibati na unta og kahinangop ang mga tag-iya og sakyanan tungod sa dako na kaayo nga pagkunhod sa presyo sa matag litro sa produkto’ng petrolyo sa milabay’ng pipila ka buwan. Tungod sa pagkunhod sa presyo sa oil products, gipakunhoran sa Land Transportation Franchising and Regulatory Board (LTFRB) ang minimum nga pletehan gikan sa P7.50 ngadto na lang sa P7.

Nagsugod na usab gani unta ang LTFRB sa pagtuon aron pakunhoran ang pletehan sa taxi ug ang Maritime Industry Authority (MARINA) sa pletehan sa pasahero sa mga barko.

Apan wala pa gani sila makahuman sa ilang pagtuon, misaka na man usab pagbalik og kapin sa dos pesos matag litro ang kantidad sa produkto’ng petrolyo.

Sa pagkunhod sa presyo sa produkto’ng petrolyo sa milabay’ng mga bulan, daghan ang nakamatikod nga wala gayud kini hingpit nga napahimuslan sa mga kabus nga katawhan sa nasud.

Kini tungod kay wala may kausaban sa presyo sa mga nag-una’ng palaliton. Sa matag higayon nga adunay pag-usbaw sa presyo sa lana, dili usab magpaiwit ang mga negosyante sa pagpaumento sa presyo sa ilang mga baligya. Aron patas unta kay mikunhod man ang presyo sa oil products, angay usab unta nga pamenosan nila ang kantidad sa ilang ibaligya nga mga produkto.

Dugang nga wala makabenepisyo sa pagkunhod sa presyo sa produkto’ng petrolyo mao ang mga senior citizen ug mga tinun-an kay sagad sa mga drayber sa PUJ wala usab mohatag og 20 porsiyento nga diskuwento sa ilang pletehan.

Sa mga higayon nga mopatuman ang LTFRB ug pagpausbaw sa minimum nga pletehan agi og epekto sa pagsaka sa presyo sa produkto’ng petrolyo, ang mga drayber sa PUJ ug operator mokuha dayon og taripa aron sila makakolekta sa bag-o nga pletehan.

Balit-ad kaayo kini karong panahona nga gipakunhoran sa LTFRB ang minimum nga pletehan kay ang mga drayber wala gayud mokuha sa bag-ong taripa aron pahibaw-on ang ilang mga sumasakay nga gipaubsan na ang pletehan.

Makiangayon ba kini ang gihimo sa mga drayber?