EDITORYAL – Armas nga ilegal

Diha nga gipahunong na ang pag-renew sa mga lisensya sa armas dinhi sa Sugbo ug gimando nga adto na lang kini himuon sa Camp Crame, daghan kaayo’ng firearm holders nga mireklamo.

Husto ang ilang reklamo kay hasol ug gastoso kaayo kun ang pag-renew sa mga lisensya adto lang himoa sa Manila. Mihulga ang mga firearm holders nga ang paagi sa Camp Crame mosangpot nga daghang tag-iya og armas ang dili na maka-renew sa ilang lisensya.

Kini maoy rason nga gitugot pagbalik sa Camp Crame nga ang mga PNP Regional Offices, apil na ang Police Regional Office-7, makadawat na og application ug maka-renew sa lisensya sa armas.

Apan bisan pa niini, wala gihapon mopahimulos sa higayon ang mga tag-iya og armas, apil ang ubang sakop sa media, pinaagi unta sa pag-renew sa ilang mga lisensya.

Makita kini sa statistics sa kapolisan nga daghan pa kaayo ang mga armas sa rehiyon-7 nga wala mapabag-o ang lisensya.

Kapin sa P1,000 ang bayranan sa pagpabag-o sa lisensya sa armas alang sa 45 kalibre nga pistola, 357 Magnum revolver ug ubang mugbo apan high powered nga pusil.

Mas taas ang kantidad nga bayranan kun ang armas automatic ug high powered. Angay nga pahimuslan sa mga firearm holders nga gibalik pa dinhi sa rehiyon ang pag-renew sa lisensya sa armas.

Ang kapolisan angay nga mohingusog gayud sa pagsakmit sa mga armas nga walay mga lisensya, ug apil na kadto’ng wala na gi-renew ang lisensya sa ilang mga tag-iya.

Huwaton pa ba nato nga ang Sugbo mahisama sa Mindanao nga bisan kinsa na lang ang maghupot og armas bisan og pangisip dili angay nga pahupton og pusil?