Ang ilimnong makahubog

Usahay may tawo nga manubra na gani sa pag-inom og tubig, mahubog sab, mobarag ug magsuka pud, nga kini dili man ilimnong makahubog, diba? Unsa na kaha ang ilimnong makahubog nga dunay sagol nga bug-at nga espiritu sa alkohol. Duna gani uban nga sa baho pa lang lipong o nahubog na.

Unya labi nag makatilaw na, ang uban namula na ang pamanit tungod kay allergy sa alcohol. Naa say uban, mahurot na lang ang mga binotelya sa tagay, wa maunsaay apan lukapa na nga ang pamati mora’g naglupad sa kagaan ang lawas. Nagpasabot lang kini nga dili kini maayo sa atong panglawas. Dili ba?

Adunay uban tungod sa kahubog didto na kamatngon sa sulod sa selda sa presinto. Di lang lawas ang nadaut hasta na ang dungog. Nawad-an og gahum nga angay tang respituhan sa isigkatawo kay permi man nagsusapinday, nga maamong sa kauwawan ang pamilya. Hangtud sige’g agulo sa kasakit sa atay.

Ako’y nalooy nga nagpanlingo sa akong suod nga higala, bisa’g daut na kaayo nga may sakit tungod sa inom, gitambagan kong dili na moinom. Apan nangatarungan pang nabuhi kuno siya sa inom busa mamatay kuno siya sa inom. Maong ig-agi nako makit-an ko ni permi naghapa sa karsadang hubog.

Karon, wa na ko kakita kay namatay na diay. Anugon nga batan-on ug gwapo pa, nga tungod desperado sa uyab, nawad-a’g paglaom sa kaugalingon. Mao nga giusikan lang ang kaugmaon sa pag-entra sa bisyo sa ilimnon nga makahubog nga usa ra gyud ka botelyang mahurot sa  bino nga 'kulapu'.

Nasayop siya sa paghubad niya sa 'a wine is good for the heart' nga maoy gisagop nga baruganan sa pagpakabuhi niya nga nakadaot hinoon sa lawas.