Aksyon dayon

CEBU, Philippines - Akong nakita nga pipila ka oras human mahitabo ang gubat tali sa mga sakop sa PNP-Special Action Force (SAF) ug sa Moro Islamic Liberation Front (MILF) diha dayon si DILG Secretary Mar Roxas nga miasikaso sa pag-atiman sa problema bisan og wala siya pahibaw-a sa operasyon. Kini gani ang rason nga ang Council for the Restoration of the Filipino Values (CRFV), ang civil society partner sa Civil Service Commission (CSC) ug Transparency International Phil., mipahalipay kang Roxas sa iyang gihimo.

Si Roxas usab maoy mirekomendar sa pagmugna og Board of Inquiry nga gipangulohan ni Director Catalino Rodriguez, ni PNP Criminal Investigation and Detection Group (CIDG) Benjamin Magalong ug Director Edgardo Ingking.

Gusto nga ipatan-aw ni Roxas sa mga sakop sa Board of Inquiry ang mga palpak nga nahitabo ang pinusilay tali sa mga sakop sa SAF ug MILF nga unta may sabut-sabot na man sa kalinaw.

Kanunay ko nga makadungog sa balita sa radyo, makabasa sa mga mantalaan sa giingon nga palpak sa kagamhanan kay ang operasyon gihimo ra man nga wala pahibaw-a ang nagdumala sa kapolisan. Alang kanako, si Mar Roxas angay g’yud unta nga pahibaw-on ug labaw na si Deputy Director General Leonardo Espina kabahin sa mao nga operasyon pagdakop kang Marwan.

Dako’ng tulobagon sa gitangtang nga SAF commander nga didto siya misunod sa kamandoan sa suspendido nga hepe sa PNP nga si Alan Purisima, inay pahibaw-on unta niya si Espina ug Roxas.

Si Roxas mipakita usab og pagtagad pinaagi sa pagbisita sa haya sa nangamatay’ng SAF didto sa Manila samtang si Presidente Aquino mitambong sa kalihukan sa tighimo og mga sakyanan.