Ang kangil-ad sa MILF

Kun magtan-aw ka sa video nga gi-upload sa internet nga nagpakita kun giunsa pagpatay sa mga sakop sa Moro Islamic Liberation Front (MILF) ang mga miyembro sa PNP Special Action Force, dili ka makapugong sa pagpakagot sa imong mga ngipon.

Tiaw mo nga bisan himatyon na ang mga sakop sa SAF nga ilang gipangpusil, duna pa’y mga sakop sa MILF nga mituyo sa pagkuha og video ug gipakita ang pagtadtad nila sa dughan sa naghayang nga polis bisan og kini patay na.

Dili masabtan kun unsay gisulti sa mga MILF. Ang nasabtan nako nga nagsigi og ingon “camera! camera!” nga nagpasabot nga atol sa paghimo nila sa linuog kaayo nga binuhatan, gusto nila nga kuhaan kini og footage aron mapakita nila sa tibuok kalibutan kun unsa sila kabangis.

Dunay mga gipangbuk-an nila sa ulo. Klaro kaayo ang mga sakop sa SAF nga ilang gipatay kay gihukasan man nila sa uniporme ug ang nahabilin sa lawas mao na lang ang nagkadugo nga T-shirt nga adunay marka ug logo nga Special Action Force.

Pagkasalbahis sa mao nga mga sakop sa MILF nga mihimo niini. Angay ba kini nga kaloy-on? Hinuon, dili tanan nga mga sakop sa MILF ang naghimo niini apan ang pangutana, unsay gihimo sa ilang labaw? Ang mao nga mga MILF nga mitigbas sa lawas sa patay na nga SAF, angay nga himoan og sama sa iyang gihimo.

Klaro kaayo nga ang MILF ra usab maoy nag-upload sa mao nga video sa internet. Imposible na man ‘sab nga adunay mga sakop sa SAF nga maoy nag-video ug mi-upload sa footage sa internet.

Kamo nga wala pa makakita, tan-awa ninyo sa internet ug sigurado ko nga ang akong gibati, inyo usab nga bation. Kun ibutang nato nga napatay nila ang mga SAF sa engkuwentro, nganong ila pa man nga gitigbas?

Duha ka tawo ang nagbanus-banos sa pagtigbas sa dughan sa usa ka sakop sa SAF nga naghayang ug patay na. Pagkahuman, gipakita sa close-up video ang nagnga-nga na nga tinigbasan.

Ang akong mga kauban nga nagtan-aw sa video nga dili anad sa mao nga talan-awon wala gayud makapugong sa pag-ingon “Hala uy! Agoyy!” Ako nga naanad na sa pagkakita og pinatyanay kay 11 ka tuig ko nga nahimo’ng police ug military reporter, nagpakahilom lang apan naglagot sa mga MILF.

Unsa may gihimo ni Presidente Aquino? Magpakahilom ka lang gihapon?