Dako’ng inhustisya

Wala magpabaya ang Mandaue City Hospital (MCH) sa ilang pag-atiman sa namatay nga pasyente nga si Jocelyn Coliflores.

Kini ang resulta sa imbestigasyon nga gihimo sa taga Department of Health human midangop sa nahisgotan’g ahensya ang bana sa namatay.

Ang resulta sa imbestigasyon nagkanayon nga nasunod sa Mandaue City Hospital ang Standard Operating Procedure sama sa pagdapat og tambal ngadto sa pasyente busa wala kini magpabaya sa ilang trabaho pag-atiman sa ilang pasyente.

Dako’ng inhustisya sa mga kabanay sa namatay ang resulta sa imbestigasyon sa DOH-7. Inhustisya tungod kay ang migawas, dili resulta sa imbestigasyon, kondili, resulta lang kini sa gihimo nila’ng pagbana-bana.

Inhustisya tungod kay ang resulta bunga sa imbestigasyon nga ang tumong og tuyo mao ang pagtago ug paglimpyo sa mga tawo ug sa tambalanan nga gireklamo ug dili sa pagpalutaw sa tinuod nga hitabo.

Sa wala pa mamatay si Jocelyn Coliflores, miadto siya sa Mandaue City Hospital aron magpahiling tungod sa iyang hilanat nga magsige lang og balik-balik. Apan adto’ng higayona wala siya’y hilanat sa diha’ng gikuhaan og temperatora pero gipainom sa tambal nga giresita. Hilanat nga magbalik-balik gitambalan og para sa UTI.

Resulta, paglabay sa 30 minutos, ang pasyente mikurog ug namatay. Mao ba kini ang giingon sa Department of Health 7 nga wala magpabaya ang MCH sa ilang trabaho?

Ang pasyente namatay bisan sa kalagsik pa sa lawas niini dihang nagpahiling sa MCH. Ang iyang kamatayon dili ba igo nga kamatuoran sa nahimo’ng pagpabaya sa mga medical personnel sa tambalanan?