Magpasalamat si Mar Roxas

Sa pagbantang sa 44 ka patay’ng lawas sa mga sakop sa PNP Special Action Force, misantop dayon sa huna-huna sa katawhan ang dagway ug pangalan ni DILG Secretary Mar Roxas nga maoy utok sa palpak nga operasyon.

Kini tungod kay ubos man sa iyang departamento ang kapolisan sa nasud.  Apan nasayop diay kita kay si Mar Roxas biktima pud diay sa lansis ug lipot nga gihimo nila ni Executive Secretary Paquito Ochoa ug sa suspendido’ng PNP Chief nga si Alan Purisima.

Kun tutokan pag-ayo, imo usab nga makita ang dagway ni Presidente Noynoy Aquino nga gitabonan niya sa iyang mga kamot samtang nagpasiplat siya kang Mar Roxas nga iyang gikingkoy.

Bisan kinsa ang pasultion ug pangutan-on, sila moingon nga ang nagsugo sa palpak nga operasyon mao si Presidente Aquino tungod sa rason nga si Executive Secretary Ochoa dili magbuot-buot kun wala pa kini pagtugot sa pangulo.

Ingon sa tinuod ang pagtuo kay kun wala pay pagtugot ni Presidente Aquino ang mao nga operasyon gitangtang na unta niya si Ochoa sa katungdanan, apan wala niya kini himoa.

Kun si Presidente Aquino wala’y labot sa palpak nga operasyon ug wala niya gikingkoy lang si Mar Roxas, dili na niya pabuntagan pa sa iyang puwesto si Ochoa tungod sa kadako sa kasal-anan nga nahimo niini kaniya ug sa nasud.

Kun wala’y labot ang pangulo sa palpak nga operasyon nga miresulta sa kamatayon sa 44 ka sakop sa SAF ug buot-buot lang kini ni Ochoa, kinahanglan nga siya tangtangon sa iyang katungdanan.

Gikingkoy man si Mar Roxas ni Presidente Aquino ug gilansisan lang nila ni Ochoa ug ni suspended PNP Chief Alan Purisima, angayan nga magpasalamat si Roxas kay wala siya maapil ug nakalingkawas sa tulisok sa katawhan ug sa mga kabanay sa mga polis nga gipang-ihaw didto sa Mamasapano, Maguindanao.