Naihaw sa kahakog sa mga labaw

Angayan nga manubag si suspendidong PNP chief Alan Purisima sa iyang paghimo nga "special project" sa pagdakop sa international terrorist nga si Marwan tungod sa patong sa ulo niini’ng maong Malaysian nga balor og $5 milyones.

Sa mga report nga atong nadawat, si Purisima ug si Executive Secretary Paquito Ochoa ang nakigkontrata sa gobiyerno sa US aron dakpon si Marwan. Tungod kay gusto’ng solohon nila’ng Purisima ug Ochoa ang $5 milyones nga reward pagdakop kang Marwan, wala nila pahibaw-a si DILG Secretary Mar Roxas ug PNP OIC Leonardo Espina. Malagmit, kadto’ng kapin sa 300 nga Special Action Force commandos nga gi-deploy wala masayod sa $5 milyones nga reward.

Dili madawat sa mga Filipino ang ingon niini’ng pagka-suwapang nila’ng Purisima ug Ochoa nga pulos sakop sa Samar group ni Bise Pres. Jejomar Binay. Kay diha sa ilang paghunahuna lang sa reward money nakalas ang 44 ka kinabuhi sa mga bagitong SAF commando. Si Roxas mao untay supervising authority sa PNP ug dili unta angayan nila’ng bakakan ug tago-tagoan sa ingon ka sensitibong misyon. Apan wala magdumot si Roxas, nangunay kini pagpahimutang sa mga patay'ng lawas sa 44 ka commando.

Paabuton nato ang resulta sa Board of Inquiry nga gihulma ni Roxas aron pagsusi sa nahitabo. Kritikal ang resulta niini’ng imbestigasyon paghatag hustisya sa #Brave44 ug pagdeterminar sa responsibilidad nila’ng Purisima, Ochoa, ug tingale, ni Pres. Noynoy kun dili na siya presidente.

Si Noynoy maka-eskapo man karon sa iyang tulobagon tungod niining "constitutional immunity from suit" sa presidente samtang anaa pa kini sa puwesto, apan dili magisi sa libro sa kasaysayan sa Pilipinas nga sa iyang termino nahitabo ang pagkamatay sa 44 ka commando tungod sa iyang pabaya bisan nasayod siya’ng gipang-ihaw na sa mga MILF ug BIFF ang atong mga tropa.

Dili usab malikayan ang paghisgot hangtud sa mosunod nga henerasyon sa katig-a sa kasingkasing ni Noynoy.

Una, misumad na lang kagahapon ang ikaduha’ng massacre sa Mamasapano, Maguindanao, apan wala g’yud ko makadungog kang Noynoy nga mimando og halapad nga "manhunt" sa mga sakop sa MILF ug BIFF nga miihaw sa 44 ka polis. Pastilan!

Ikaduha, absent siya sa arrival honors sa 44 ka SAF commandos kay miadto sa planta og sakyanan.

Ikatulo, wala gani mosaludo sa mga polis sa iyang pagbiya pagkahuman sa iyang speech sa necrological service sa Taguig niadto’ng Biyernes.

Ug ngano’ng ang mga rebelde’ng MILF miapil sa pag-ihaw sa mga polis, ug nganong wala sila makabadlong sa mga bandido’ng BIFF nga nagkampo duol sa ilang kampo sa MILF?

Mga pangutana kini nga angayan tubagon sa ilang mga representante inigtigum na sa Board of Inquiry.