Ang talagsaong panugon

Naghulagway kini sa usa ka tawo nga modelo o sumbanan sa katalagsaon sa iyang pagkatawo. Dili lang giampingan ang iyang kadungganan. Maayo nga amahan sa panimalay ug manggihunahunaon usab sa kaayohan sa isigkatawo. Gibuhat niya ang tanang mahimo, bisan pa ang iyang kinabuhi andam i-alagad.

Mao nga naghimo siya’g testamento o panugon sa mga anak, sa ingon makaseguro siya sa buot ipasunod kun sa higayon nga bawian na sa kinabuhi.

* Nga dili ko ipalubong sa yuta ug labi na dili ko gusto isulod sa lungon. Mura’g lisud tumanon, di ba? Apan aduna siya dakung tinguha nga makatabang.

* I-‘donate’ ang akong mga mata, ngadto sa mga tawo nga wala pa tugahi nga makakita sa kaanindot sa kahayag, tungod lang kay walay salapi ikagasto.

* Hasta ang akong kidney, ihatag niadtong wala gyud intawoy ikaabot nga kailisdan ang depektuso, aron sa ingon dili na mag-antus sa balatian.

* Ihatag usab ang ubang bahin sa akong lawas, aron magamit nga ma-eksperimentohan sa pagdiskubre og mga ikaayo sa mga sakit sama sa kanser.

* Human matun-an  ang patay kong lawas, sunoga kini ug ayaw isabog sa dagat, kinahanglan ang abo isabwag sa yuta aron kapuslan sa mga tanom.

* Kun aduna may angay nga ilubong kadto lang mga kasaypanan ug kahuyangon nga naghatag kaulawan sa akong pagkatawo.  Tugon ni sa buhi pa, bisan ang patay’ng lawas, ihalad niyang kapuslan.