EDITORYAL - Kinahanglan ang kalinaw

Angay pamalandungon og maayo sa mga opisyal ingon man niadto’ng mga interesado’ng pundok kun unsay epekto ug politikal nga implikasyon kun iatras ang Bangsamoro Basic Law sa idlas kaayo’ng kalinaw sa Mindanao.

Masabtan kaayo ang grabe nga aligutgot nga gibati karon tungod sa masaker nga nahitabo sa mga PNP-Special Action Force sa Maguindanao. Makapanimbawot og balahibo di lang sa mga taga Mindanao ang panawagan nga maayo pa’ng gubaton.

Nasuwayan na kaniadto diha nga nag all-out war si kanhi presidente Joseph Estrada batok sa Moro Islamic Liberation Front, daghang kinabuhi ang nakalas sa duha ka habig, liboan ang naapektahan apan wala mapuo ang mga rebelde.

Nanganak pa hinuon kini tungod kay ang mga nailo nga kabataan sa mga rebelde’ng nangamatay, nanagko na man ug makapas-an na og armas ug naghambin og pagdumot sa gobiyerno.

Apan gamay lang sa katawhan ang nasayod sa politikal nga implikasyon sa all-out war. Maguba ang imahen sa Pilipinas sa mata sa mga negosyante’ng gusto’ng mamuhonan sa Mindanao ug ilabi na sa mga nasud nga naghago alang sa peace process.

Pila na man ba ka presidente ang nanglabay apan wala g’yud masulbad ang problema sa Mindanao?  Magsugod na usab sa uno ang mosunod kang Presidente Benigno Aquino III?

Pila na ‘sab kaha ka mga kinabuhi ang makalas sa habig sa mga sundalo, polis, sa mga rebelde ug labaw sa tanan sa mga sibilyan?

Kun ang atong mga opisyal mawad-a’g pagsalig sa peace process unsa may masunod sa umaabot nga henerasyon?