Wooden Sheep

Year of the wooden sheep karon. Mura’g wala kaayo ni makalingaw ug makadani sa atong mga pagtagad. Lahi sa year of the tiger, year of the snake, year of the horse ug uban pa.

Wooden sheep? Literally, kahoy nga karnero? Giingon dinhi, wooden sheep or goat; Tuig diay ron sa mga kanding. Matud pa: “The wooden sheep (or goat) promises prosperity, luck, and opportunity.” Maayo diay.

This early, ato na ba kini’ng na-felt? Sa usa ka survey nga gihimo sa naghinapos ang 2014, nakita nga ang Pinoy naglantaw sa usa ka mauswagon ug malaumon nga 2015, ug nag-anam na usab pagkunhod ang gidaghanon sa gigutom.

Sa zodiac sign, ang Sheep or Goat, nagrepresentar sa solidarity, harmony ug calmness. Una’ng bulan sa 2015, ato na ba kini’ng namatikdan karon? Ato na ba kini’ng nasinati? Ato na ba kini’ng nabatyagan ?

Ang World Bank nanag-an nga ang atong nasud makatagamtam og 6.9% nga growth rate karong tuiga, nga kuno milig-on ang atong ekonomiya, ug ang atong gobiyerno giingon nga “popular and stable.”

Nindot kun mao kini ang mahitabo karong tuiga. Apan, kini’ng solidarity, mura’g dili ni nato maangkon karong tuiga, tungod kay nag-anam na’g gimaw ang gaway sa politika. Sige na og positioning ang atong mga lider.

Hinaut nga niini’ng atong gipaabot nga panagsungi unya sa atong mga lider, dili unta ma-affected ang ekonomikanhong kahimtang sa atong nasud.

Sa iyang column sa Bulletin, si Florangel Rosario Braid, nagkanayon: “We have earned credibility because of tangible success in our efforts to weed out corruption. Our investment grade improved after earning upgrades from several credit rating agencies.”

Hinaut nga magpadayon kini hangtud sa mosunod nga mga administrasyon. Mao kini ang atong suliran karon .... kun ang mopuli unya ni Noynoy makapadayon ba sa pakigbugno sa corruption.

Kun maangkon ba gihapon nato ang credibility gikan sa ubang kanasuran ug sa international nga mga financial institution; kun mapadayon ba ang kanunay nga nagsaka nga investment ug credit rating pabor sa atong nasud.

Ang mga tubag ning maong mga pangutana ug kabalaka, matubag nato karon, kay nakaila kita sa mga tawo nga nangambisyon pagpuli ni Noynoy. Si Mar Roxas ba? Si Binay ba? Si Erap? Si Poe? Si Duterte? Si Escudero? Si Bongbong? Si Cayetano?

Ang imong tubag, ang imong choice adunay kalabutan kun unsay dangatan sa atong nasud sa umaabot nga katuigan.