Kinsa’y mas baho?

Daghan ang nagreklamo tungod sa nagpasad nga basura, sa kabaho sa basura, sa kalangay sa gobiyerno paghipos sa mga basura.

Pero sila’ng tanan nga nagreklamo sa nagpasad nga basura, sa nangabaho nga basura, sa nalangay nga paghipos sa mga basura mao ra usab ang tinubdan ug hinungdan sa mao nga problema.

Subo nga palandungon nga gipasa sa ubang tawo ang ilang suliran sa basura ngadto sa gobiyerno ug sa mga opisyal tungod sa pagtuo nga ang gobiyerno mao ang ilang mga basurero.

Ilang nakalimtan nga ang basura suliran sa tanan ug ang paghipos niini dili lang iya sa gobiyerno kun dili trabaho sa tanan busa gikinahanglan ang panaghiusa alang sa kasulbaran sa suliran.

Ang dakbayan sa Sugbo nagkaproblema sa basura ug nagkadako ang maong problema human sirad-i sa hingpit ang iyang labayanan og basura sa Barangay Inayawan. Sa paningkamot nga mahipos ang mga nabaho nga basura nga  nagpasad sa daplin sa mga karsada ug bisan diin na lang gilabay, ang dakbayan mibayad og pribado’ng landfill sa Barangay Polog, Consolacion aron adto ilabay ang mga basura.

Apan ang ubang mga garbage truck sa kabarangayan nangaguba tungod sa bati nga karsada nga agian paingon sa landfill sa Barangay Polog kay dili man kini paagion sa highway sa Mandaue kay sila mabahoan. Ang dakbayan sa Sugbo nanghangyo sa dakbayan sa Talisay nga makalabay kini og basura sa landfill sa Barangay Tapul, pero supak man ang konseho sa Talisay nga gidominar sa partido nga kontra sa mayor.

Dili pa klaro kun makalabay ba og basura sa Talisay ang dakbayan sa Sugbo kay samtang miuyon si Mayor JVR gisupak kini sa mga konsehal.

Kun dili masulbad ang suliran sa basura, mabaho ang dakbayan sa Sugbo ug kini binuhatan sa tanan nga walay pagpakabana ug walay disiplina sa kaugalingon. Tinuod nga baho ang basura, pero mas grabe pa’ng baho ang mga tawo nga nagpasagad lang og labay niini.