Dili maayo imong plano mayor

CEBU, Philippines – Dili g’yud tukma ang hulga ni Mayor Michael Rama nga iyang sirad-an ang kabahin sa South Coastal Road paingon ini’g abot diha teritoryo sa dakbayan sa Sugbo.

Kun buhaton ni Mayor Rama nga pasirad-an niya ang South Coastal Road sigurado siya nga mag-atubang og kaso sa hukmanan. Paminaw ko dili kay ang mga taga Talisay ug ubang lungsod sa habagatan mao ra ang masuko kang Rama, apil na ang taga dakbayan sa Sugbo.

Pananglit dunay mga drayber nga dili motuman sa balaud nga sundon ang gilatid nga gikusgon, dili tingali tukma nga siradoan na sa mayor ang karsada.

Unya, abi kay misupak man ang mga sakop sa Talisay City Council nga molabay og basura ang dakbayan sa landfill sa Barangay Tapul, Talisay miingon na ‘sab si Mayor Rama nga siradoan niya ang South Coastal Road.

Kun ingon niini ang imong paagi Mayor Rama, mosamot nga dili ka makakumbinser sa mga opisyal sa Talisay nga tugotan ang dakbayan nga makalabay’g basura sa ilang landfill.

Ang punto karon dinhi mao nga basin og hagiton ka unya sa taga Talisay nga pasirad-an ang South Coastal Road unya dili ka makahimo. Dili maayo nga magpadala sa kainit sa huna-huna tungod sa mga problema nga giatubang sa pagdumala sa dakbayan.

Nasayud ko nga daghan ang nakahasol karon ni Mayor Rama. Ang problema kahatagan ra og kasulbaran pinaagi sa maayong panghuna-huna ug dili ipaagi sa kainit sa ulo.

* * *

Atong awhagon ang kadagkoan sa Prevention Restoration Order and Beautification Enhancement (PROBE) nga aksyonan kini’ng binuang sa tagdumala niini’ng tindahan nga tigbaligya og mga tubig diri sa V. Gullas Street, tunga-tunga sa karaang “USP” ug The Freeman.

Kanunay g’yud nga ang sidewalk dili na kaagian og tawo kay anaa nila gipundo ang mga ginalon nga tubig ug ang traysikad nga kargahanan nila sa tubig.

Awhagon nako si Raquel Arce, hepe sa PROBE, nga aksyonan kini sa labi’ng dali nga panahon. Ang aseras dili mahimo’ng gamiton lang sa negosyo.

Angay pa gani nga susihon kini sa City Hall kun kini’ng mao nga tindahan nga nagsilbe nga dealer og ginalon nga tubig aduna ba’y business permit.

Alang sa tagdumala niini’ng mao nga tindahan, ayaw pag-abuso nga magnegosyo ka unya hasulon nimo ang publiko nga dili na makalakaw sa aseras.