Salamat sa seguridad ni Papa

Luwas nga nakauli sa Vatican City sa Roma si Pope Francis. Kini tungod sa maayo’ng pagbantay sa kapolisan, militar ug uban pa aron luwas ang Santo Papa sa iyang pagbisita dinhi sa Pilipinas.

Ang kalampusan sa seguridad sa Santo Papa ma-credit nato ngadto sa overall in-charge sa seguridad nga si DILG Secretary Mar Roxas.

Ang credit atong ihatag ngadto sa angayan nga hatagan niini ug si Secretary Roxas angay nga pasidunggan tungod sa kalampusan sa paghatag og seguridad ni Pope Francis.

Kun ako lang, pahalipayan nako si Roxas tungod sa maayo niya’ng trabaho.

Ang paghatag og seguridad sa mga pangulo sa nasud nga mobisita sa laing kanasuran responsibilidad kini sa kadagkoan sa dapit nga iyang bisitahan. Dili kini sayon nga trabaho, labaw na kun ang mobisita pangulo sa dako’ng kahugpongan sa relihiyon.

Ang palpak nga seguridad sa usa ka pangulo sa nasud nga mobisita og laing kanasuran makamugna og kaguliyang ug posible’ng moresulta pa kini og gubat.

Busa dili sayon ang trabaho ni Secretary Roxas isip overall in-charge sa seguridad sa mibisita nga Santo Papa.

Ato pud nga pasalamatan ang Bangsamoro Independent Freedom Fighters,  Abu Sayyaf, New Peoples Army (NPA) ug uban pa’ng grupo nga kontra sa gobiyerno nga nagdeklarar og ceasefire tungod sa nagbisita’ng Santo Papa.