Malampusong preparasyon

Ubos kaayo ang crime rate sa Manila atol sa pagduaw ni Papa Francisco.

Maayong hatagan og presidential citation ang Department of Interior and Local Government nga gipanguluhan ni Sec. Mar Roxas tungod sa iyang personal nga pagdumala sa mga lokal nga kagamhanan ug Philippine National Police atol sa papal visit. Walay mga krimen nga nanghitabo sa Manila nga nakabalda sa pagduaw sa Santo Papa. Butang kini nga angay ikalipay sa mga Pilipino.

Sukad sa Day 1 sa preparasyon sa papal visit hangtod sa pag-uli ni #LoloKiko sa  Vatican, anaa si Roxas nagsuperbisar. Bisan sa pag-igo ni bagyong Amang sa Leyte, anaa si Roxas wala mobiya sa pag-monitor sa sitwasyon. Gibutang sa DILG si SPO3 Jaime Castro isip si Santo Papa sa mga dry-run, samtang gihimo siyang food-taster (kon tigtilaw paglikay sa hilo) sa mga pagkaon alang kang Papa Francisco. Walay sami ang mga kalihukan sa papal visit. Tungod kini sa walay puas nga preparasyon nga gihimo sa gobiyerno.

Malipay kaayo ang mga Pilipino niini isip rekord ngadto sa tibuok kalibutan ang malampuson ug malinawon nga pagduaw sa Santo Papa dinhi sa Pilipinas.

* * *

Sa kadaghan sa pagtulon-an ni Papa Francisco sa iyang pagduaw dinhi sa Pilipinas nga gitapos niadtong Lunes, naglibog ko unsay akong gustong hisgotan isip pamalandong. Apan akong higalang editor sa pikas pamantalaan, sa iyang Facebook post, miingon nga nakabantay siyang mas daghan ang mga posts ug comments kalabot sa papal visit kay sa Sinulog 2015.

Makasabot hinuon kita nganong ingon niini. Una, natayming lang gyud ang pagduaw sa Santo Papa sa kasaulogan sa Pista Senyor. Ikaduha, panagsa ra moduaw kanato ang Vicar of Christ nga maoy Obispo sa Roma ug ang nangulo sa hapit 2 ka bilyon nga Katoliko Romano lukop kalibutan.

Apan gusto nakong balikbalikon aron ipahigmata sa kaparian sa Artdiyosesis ang pagtulon-ang gipuy-an sa Santo Papa: ang “pobreng simbahan ug ang simbahan alang sa mga pobre.”

Dakong hagit alang sa mga pari kining maong panawagan sa Santo Papa. Hagit kini ilabi na niadtong mga parokya nga gipamutangan na og presyo ang pagpamisa sa mga kalag ug pasalamat, gipresyohan na og tag-P2,000 ang pagpalubong sa minatay (sama sa Immaculate Heart of Mary Shrine sa Minglanilla), ug ang pagpakasal.

Ang pobre intawon dili makapalubong, dili makapakasal ug dili makapabunyag kun walay kuwarta. Hagit kini ni Arsobispo Jose Palma unsaon pagkumbinser sa iyang mga kura paroko ug team ministry pagpuyo sa pagtulon-an sa Santo Papa.