Tubag sa tanang pangutana
Sa kadaghan sa cameras nga naghulagway sa misa ni Pope Francis taliwa sa uwan ug hangin sa bagyong Amang sa Tacloban airport, ug sa kadaghan sa mga sakop sa media nga nagsunod sa matag lakang ug sulti sa kalihokan sa Santo Papa, way nakapahibawo nato sa kamatayon sa usa sa nisimba. Si Kristel Padasas, 27, nagtrabaho sa Catholic Relief Services, namatay human nahagbongan sa sound box dihang nahugno ang gipahimutangan nga damba. Unang nakahatag sa kasayuran mao ang kaparian nga kuyog sa Santo Papa. Kinsa wa lang mopahibawo sa trahedya, nihangyo pa gyod sa kaliboan nga nitambong sa iyang kalihokan sa UST pagpangaliya uban niya alang sa biktima ug sa nagbangotan niyang mga ginikanan.
* * *
Mahimo baya nga, sama sa ubang mga naghupot og gahom, tapin-an niyang insidente. O di na lang hisgutan. Mahimo ra gyud unta nga di mag-usik og panahon alang sa batan-ong biktima. Kay wa ra sa kumingking sa kalibutanon niyang tahas pagluwas sa kalag sa 1.5 bilyones nga Katoliko. Gawas pa, kun angkunon ang panghitabo, mahimo siyang matulisok kay namugos pagduaw sa Leyte bisan sa bagyo. Apan wa managana si Pope Francis pag-angkon og responsibilidad. Ug pagtanyag og di lang simpatiya ug pangaliya kon dili konkreto gyud nga tabang alang sa namatyan nga mga tagtungod.
* * *
Laing pagtulon-an sa pagduaw ni Pope Francis mao ang pag-angkon nga wa siya’y tubag sa tanang pangutana. Nisuway siya pagpasalig sa mga biktima sa bagyong Yolanda nga di sila pasagdan ni Hesus, kinsa nakasabot sa ilang gidangatan kay nakaagi sab og bangis nga katalagman. Apan dayong tapos sa iyang wali, niangkon nga way pung nga ikatubag nganong nagusbat ang ilang kabtangan, panginabuhi ug pamilya. Masulub-on ug nagpanlingo siyang naminaw sa mga sugilanon sa mga gikasawo sa daklit nga paniudto sa Palo. Igo lang nitubag: “Unsa may akong ikasulti?” Pinaagi sa pagpakahilom, nanghinaot ang Santo Papa nga ang kasingkasing ni Hesus makahatag og mas tin-awng tubag sa mga pangilaba sa mga kasingkasing sa mga biktima.
* * *
Sa iyang pakig-atubang sa mga batan-on sa UST, nga pipila nagpakisayod unsaon pagdawat ang nagbaha nga kasayuran sa internet, si Pope Francis nitataw nga di makadaot ang abundang kasayuran, angay hinuong tukion unsaon paggamit alang sa kaayuhan.
Gitambagan niya sila sa di pagsunod sa panghunahuna sa computer nga nahibawo sila sa tanan. Ambot nakasuway ba si Pope Francis sa Google Now Launcher, nga makatabang sa mobile phone pagtubag sa bisan unsang pangutana. Tungod sa iyang tambag akong gisuwayan og pangutana, “What is life?” Babaye nga tingog ang nitubag: “Life is the condition that distinguishes animals and plants from inorganic matter, including the capacity for growth, reproduction, functional activity, and continual change preceding death."
* * *
- Latest
