Wali ni Pope Francis
(Palihug tugoting mangahas paghubad sa wali ni Pope Francis sa iyang misa sa Tacloban taliwa sa uwan ug hangin sa bagyong Amang.)
Duna tay labaw’ng pari nga mobati sa atong kahuyang, nahiagom sa samang mga pagsuway, apan way sala. Si Hesus sama nato. Si Hesus nagpuyo sama nato. Si Hesus sama nato sa tanang butang, gawas sa pagpakasala. Kay si Hesus di makasasala. Apan aron mahisama nato, gipas-an niyang atong kahimtang ug kasal-anan. Gihimong iyang kaugalingon nga sala.
Si Hesus kanunay’ng nag-una nato. Sa atong pagsinati og krus, Siya nag-una nato. Nia ta, 14 ka buwan human sa bagyong Yolanda, kay wa mahuyang ang atong pagtuo. Kay si Hesus nag-una nato. Sa pagpasakit, iyang gipas-an ang tanang kalisdanan.
May isulti ko ninyo gikan sa akong kasingkasing: Pagkakita nako sa katalagman gikan sa Roma, nabatyagan nako nga kinahanglang moanhi. Ug nihukom dayon pag-anhi. Nia ko aron makig-uban ninyo. Uwahi na og gamay, apan nia ko. Aron pagsulti ninyo nga si Hesus Ginoo ug di ta niya pasagdan.
Padre, moingon tingali mo nako, gipasagdan ko kay nawad-an ko og pinuy-anan ug panginabuhi. Tinuod ug akong tahuron kanang sentimento, apan si Hesus (nitudlo sa Krus) gilansang sa Krus ug gikan sa Krus wa ta niya pasagdi. Nahimo siyang Ginoo nianang trono, diin nahiagom sa tanang katalagman nga atong nasinati. Si Hesus Ginoo ug ang Ginoo sa Krus uban kaninyo. Sama siya nato. Maong duna tay Ginoo nga mohilak uban nato, molakaw uban nato, sa labing lisod nga mga higayon sa kinabuhi.
Daghan ninyo nadawad-an sa tanan. Wa ko mahibawo unsay isulti ninyo. Apan ang Ginoo nahibawo unsay isulti ninyo. Nawad-an mo sa kabahin sa inyong pamilya. Bugtong nakong mahimo ang pagpakahilom. Molakaw uban ninyo nga hilom ang kasingkasing. Daghan ninyo nangutana, ngano man Ginoo? Ug sa inyong kasingkasing, si Kristo motubag gikan sa iyang kasingkasing sa Krus.
Atong tan-awon si Kristo. Nakasabot siya nato kay iyang naagian ang tanan natong nasinati. Ug tapad sa Krus ang Iyang inahan. Mura tang bata, way nahibaw-an. Sa mga higayon sa labihang kasakit, nga wa nay masabtan, mokupot sa Iyang kamot ug motuaw, Mama, sama sa bata kun mahadlok. Tingali mao ray atong masulti atol sa kalisdanan: Inahan. Mama.
Manghilom ta, tan-awon si Kristo sa Krus, tan-awon ang atong inahan, mangupot sa iyang sinina ug uban ang lunsay’ng kasingkasing moingon: Inahan. Sa hilom, mangaliya, isumbong sa inahan, unsay naa sa inyong kasingkasing. (Kahilom)
Duna tay Mama Maria ug bantogang igsuong Hesus, wa ta mag-inusara. Sa katalagman daghang igsuon nga nitabang ninyo ug nahimong mas suod kay nagtinabangay. Mao ni ang sud sa akong kasingkasing ug pasayloa kun way laing pung nga makapadayag niini: Di mo pasagdan ni Hesus. Di mo pasagdan sa gugma ug kamapinanggaon ni Mama Maria. Ug samtang nagkupot sa iyang sinina ug uban ang gahom sa gugma ni Hesus sa Krus, magkuyog pagpanlakaw, isip mga igsuon sa diha Ginoo, ngadto sa unahan.
- Latest
