Ayaw g’yud kalimot

Nagmalampuson ang gipahigayon nga 3-day year-end Command Conference sa Bureau of Fire Protection (BFP)-Region 7 kaniadtong Enero 13-15 nga gipangulohan ni BFP-7 Regional Director Sr. Supt. Ma. Luisa C. Jadjula.

Daghan ang mga maayo’ng nahisgotan aron mapalambo pa ang kalidad sa serbisyo sa BFP ngadto sa publiko. Lakip sa nahisgotan mao ang katungdanan sa atong kabomberohan sa pagbisita ni Pope Francis sa Pilipinas sanglit nagpadala man ang BFP-7 og mga sakop sa Special Rescue Unit (SRU) sa Tacloban.

Hitsas sa kahimanan ang mao nga grupo sa pagtubag og alarma nga maglambitgit og hazardous materials. Ang ilang tahas mao ang pagtabang sa pagpatuman sa kahapsay ug seguridad sa pagbisita karo’ng adlawa sa Santo Papa sa Tacloban.

Sa pikas bahin, ugma na ang labing engrande ug mabulokon’g festival sa tibook nasud - ang Sinulog 2015. Sama sa akong nahisgotan kinahanglan nga mag-amping kita sa dili pa mogawas sa atong panimalay aron pagtambong sa santos nga misa sa Basilica Minore del Sto. Niño ug dayong saksi sa street dancing.

Ang inyong kabomberohan malaumon nga inyong gituman ang mga pahimangno nga sa dili pa mogawas sa panimalay, kinahanglang ibton ang tanang nakasaksak nga dekuryente’ng appliances.

Mas maayo nga palungon na lang g’yud ang plangka aron hingpit kita nga luwas sa sunog. Mas maayo usab nga palungon ang gidagkotan nato’ng kandila sa mga altar.  Isiguro usab nga na-off nato ang regulator sa atong LPG tank.

Dili siguro maayo nga dunay magbahasbahas nga trak sa bombero sa panahon sa Sinulog kay sigurado ko nga makamugna kini og kaguliyang unya.

Atong isiguro nga luwas kita sa sunog niining mga panahona aron hapsay ang atong pagsaulog sa kapistahan sa Batang Hesus. Gikan sa kinatibuk-ang puwersa sa BFP-7, Viva Pit Senyor!!!